Membru Karate-Do Kusinryu Maliana, Munisípiu Bobonaro halo hela ezersísiu preparasaun atu ba sa’e sintu iha nasionál. Imajen Tatoli/Sérgio da Cruz.

BOBONARO, 23 juñu 2022 (TATOLI) – Treinadór Karate-Do Filiál Maliana, Munisípiu Bonbonaro, António Barreto da Conceiçao fó-sai katak, atleta na’in-ualu preparadu ona atu ba ezame sa’e sintu iha Dili.

Nia informa, tuir loloos atleta hotu-hotu treina to’o ona fulan-neen mak domina ona matéria tenke promove ona ba sa’e sintu, maibé dezde tinan 2015 membru Karete-Do Kusinryu, Maliana seidauk hetan promosaun tanba kestaun orsamentu no pandemia Covid-19.

“Loron rua liubá, ha’u simu informasaun hosi nasionál katak tinan neen mak Kusinryu nasionál halo Gaisuku nasionál, entaun ha’u konfirma ona sira bele simu Karate-Do munisípiu, ne’e mak delega ona sira nai’n-ualu, feto haat no mane haat, aban ba ona Dili,” nia informa ba Tatoli, iha Jináziu Maliana, kinta ne’e.

Nia akresenta, membru na’in-ualu sei promove hosi sintu azúl ba sintu kafe-nurak, tanba durante ne’e kompleta ezersísiu no domina ona matéria bázika.

“Sira-nia preparasaun másimu loos, tanba labarik sira-ne’e badinas treinu, disiplina no hanesan eskola ida karik domina ona matéria sira, ne’ebé sira-ne’e merese duni atu ba partisipa ezame sintu iha Dili,” nia hateten.

Membru Hilária Misisipi do Rego Amarál, preparadu no prontu ona atu ba tuir ezame sa’e sintu iha nasionál tanba durante ne’e domina ona matéria fíziku no téknika.

“Ha’u fiar-aan no sente ta’uk oituan, maibé sente kontente bele ba tuir ezame sintu kafe-nurak nian, ne’e hanesan di’ak ida mai ha’u atu haka’as-aan dezenvolve talentu, atu aban bainrua iha eventu ruma, ha’u mós bele partisipa, no liuhosi trienu ida-ne’e bele salva-aan hosi kualkér ameasa iha ne’ebé de’it,” nia espresa.

Daudaun ne’e membru Karate-Do Filiál Maliana na’in 90-resin mak halo hela ezersísiu semana ida dala-rua iha Jináziu Maliana, komposta hosi sintu-mutin (Shirobi) to’o Dan 3 (Sandan).

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here