Ministru Asuntu Parlamentár no Komunikasaun Sosiál, Francisco Jerónimo. Imajen TATOLI/Francisco Sony

DILI, 23 junu 2022 (TATOLI)—Ministériu Asuntu Parlamentár no Komunikasaun Sosiál (MAPKOMS), kinta ne’e, hamutuk ho diretór jerál hosi ministériu ka Instituisaun Estadu halo reuniaun koordenasaun hodi avalia servisu relasiona ho intervensaun iha Parlamentu Nasionál (PN), nune’e ba oin bele mellora servisu di’ak liután.

“Reuniaun ida-ne’e, reuniaun koordenasaun entre Ministériu Asuntu Parlamentár no Komunikasaun Sosiál ho Ministériu hotu ne’ebé iha ne’e, ami halo koordenasaun ho Diretór Jerál sira atu haree téknikamente oinsá ami bele hatan preukupasaun deputadu sira-nia ho lalais no efetivu. Tanba, durante ne’e ami nota katak, iha problema tékniku balun ne’ebé presiza hasoru malu atu ko’alia. Tanba ne’e, reuniaun ne’e halo avaliasaun no fó hanoin ba malu atu bele halo servisu di’ak liután,” Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, hateten ba jornalista sira, hafoin hala’o reuniaun diretór jerál kada ministériu iha Arkivu no Múzeu Rezisténsia Timor-Leste (AMRT-sigla portugés), Díli, kinta ne’e.

Governante ne’e hateten, durante iha servisu, MAPKOMS no Ministériu sira iha progreseu servisu barak, ligadu ho problema ne’ebé Deputadu no Deputada sira foti iha Parlamentu Nasionál, MAPKOMS no Ministériu koordena no fó informasaun fali ba deputadu sira.

“Ami-nia progresu (servisu) mak buat lubuk ida ne’ebé Deputadu sira foti, ami sempre iha koordenasaun no fó mós informasaun mai fali Deputadu sira liuhosi hakerek, maibé nia desáfiu ami hasoru mak problema liña koordenasaun. Tanba, dala ruma iha Ministériu sira-ne’ebé ami tau hela ema iha ne’ebá, ema iha tiha derrepente nia muda, ho ida-ne’e afeta ba ami-nia koordenasaun sira-ne’e. Nune’e mós akontese katak, Diretór sira halo tiha preparasaun sira hotu, maibé mai fali Gabinete mak dala ruma haluha no la haruka fali mai. Entaun, ida-ne’e mós sai dezafiu maibé ami hetan ona solusaun hamutuk,” nia dehan.

Solusaun ideál mak, tenke iha koordenasaun di’akliu, se kuandu seidauk iha telefone malu no husu informasaun la’o ona ka oinsá, nune’e, bele fasilita servisu lalais.

Diretora Jerál Prestasaun Saúde hosi Ministériu Saúde (MS), Odete da Silva Viegas, akresenta enkontru ne’ebé organiza hosi MAPKOMS hanesan enkontru avaliasaun, signifika katak durante ne’e Parlamentu Nasionál levanta hela kestaun ne’ebé relasiona ho Liña Ministériál hotu nia papél, inklui Ministériu Saúde.

Hosi enkontru ne’e atu fó hanoin ba Diretór Jerál sira, katak karik iha mekanizmu seluk ne’ebé di’ak atu bele fasilita di’ak liután servisu sira, durante ne’e Parlamentu Nasionál kestiona, tanba hosi janeiru to’o maiu iha 106 relatóriu, ida hetan resposta mak 24, maibé 66 pergunta laiha resposta.

“Tanba ne’e, preukupasaun sira-ne’e MAPKOMS husu atu bele kria koordenasaun di’ak ba asuntu ne’e. Ho ne’e, ha’u hanoin katak ideia di’ak,” nia hateten.

Ministériu Asuntu Parlamentár no Komunikasaun Sosiál (MAPKOMS), hanesan departamentu governamentál ida-ne’ebé responsavél ba konsesaun, ezekusaun, koordenasaun no avaliasaun polítika ne’ebé definida no aprovada, liuhosi Konsellu Ministru ba Área Komunikasaun Sosiál no Asuntu Parlamentár bazea ba Dekretu-Lei númeru 42/2020, loron 01 fulan-outubru, tuir estrutura orgánika hanesan hatuur iha artigu 2.

Artigu 15 hosi Dekretu-lei nú. 42/2020, 01 outubru, hatuur Gabinete Asuntu Parlamentár (GAP), nu’dae servisu sentrál hodi fó apoiu tékniku no administrative ba ministru iha matéria relasaun Governu ho Parlamentu nasionál no bankada Parlamentár sira.

Atu fasilita servisu entre órgaun rua ne’e, mak liuhosi Diploma Ministeriál nú. 3/2021, 18 janieru, Estrutura órtganika funsionál MAPKOMS nian iha mudansa ho kriasaun unidade rua (2) iha Gabinete Asuntu Parlamentár (GAP) nia okos mak hanesan; Unidade Koordenasaun ho Komisaun Espesializada sira no Plenáriu iha Parlamentu Nasionál (UCCEPPN, sigla portugés) no Unidade Koordenasaun ho Bankada no Konferénsia Líder Bankada sira (UCBCLB, sigla portugés).

Papel prinsipál Unidade Koordenasaun ho Komisaun Espesializada sira no Plenáriu iha Parlamentu Nasionál (UCCEPPN) no unidade Koordenasaun ho Bankada no Konferénsia Líder Bankada sira (UCBCLB) mak;

  1. Fó apoiu ba Primeiru-Ministru ne’ebé koadjuva ba Ministru Asuntu Parlamentár no Komunikasaun Sosiál hodi konsolida no asegura relasaun entre Governu ho Parlamentu Nasionál; Akompaña atividade;
  2. Akompaña atividade reuniaun plenária, reuniaun komisaun parlamentár no reuniaun líder bankada;
  3. Akompaña prosesu lejislativu komun, ne’ebé envolve iha diskusaun, aprovasaun no publikasaun aktu lejislativu sira [membru Governu mak partisipa no akompaña hosi tékniku sira].
  4. Realiza atividade rutina hodi transmite informasaun liga ho administrasaun no atendimentu públiku.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here