BOBONARO, 23 juñu 2022 (TATOLI) – Prezidente Komisaun Reguladora Arte Marsiál (KRAM), Octavio da Conceiçao, fó-sai katak kandidatu membru organizasaun Persaudaraan Setia Hati Terate (PSHT) hosi munisípiu haat sei partisipa serimónia graduasaun sintu iha Jináziu Maliana, munisípiu Bobonaro.
“Sira-nia planu sei gradua duni iha fulan-agostu ida-ne’e, mai hosi munisípiu haat ho totál membru purvolta rihun tolu-resin, mai hosi munisípiu Ermera, Covalima, munisípiu ida tán no Bobonaro rasik mai gradua iha Maliana,” nia informa ba jornalista sira iha Jináziu Maliana, kinta ne’e.
Notisia Relevante: Kandidatu membru PSHT 1.057 hosi Bobonaro sei gradua iha tinan ne’e
Maibé nia dehan, ne’e hanesa planu ka oráriu tentativa ne’ebé prepara hosi lideransa PSHT, maibé KRAM seidauk deside, tanba ne’e presiza koordena ho KRAM hamutuk ho Komandu Polísia Nasionál Timor-leste (PNTL) munisípiu Bobonaro atu haree asuntu seguransa nune’e bainhira realiza serimónia graduasaun iha ambiente pás no estabilidade.
Nia akresenta, organizasaun arte-marsiál hotu-hotu ne’ebé eziste iha Timor-Leste molok hetan legalidade hosi Rejistu Notariadu atu halo atividade ezersísiu no graduasaun tenke submete karta deklarasaun livre konflitu internál no esternál.
“Ha’u husu ba líder organizasaun sira hosi Ikatan Kerasa Sakti, Kmanek Oan Rai Klaran, atu koopera ho lideransa PSHT Bobonaro hodi asegura pás no establidade iha serimónia ne’e.
Prezidente Sub-KRAM Munisípíu Bobonaro, José Ramos, enkoraja lideransa PSHT nian iha munisípiu Bobonaro atu halo esforsu másimu ho entidade relavante sira nune’e serimónia graduasaun ne’e bele la’o ho susesu.
“Tenke halo karta ida atu halo enkontru ho seguransa munisípiu Bobonaro ho autoridade sira, nune’e haree didi’ak seguransa la’o oinsá, depois pendekar sira mai iha Indonézia ne’e atu hela iha-ne’ebé,” nia fó hanoin.
Jornalista : Sérgio da Cruz
Editór : Evaristo Soares Martins