Diretór Secundaria Técnica Vocacional e Tecnologia 28 Novembro Becora, Pedro da Silva Ximenes Belo. Imajen Tatoli/Francisco Sony

DILI, 23 juñu 2022 (TATOLI)—Estudante Eskola Ensinu Sekundáriu Tékniku Vokasionál (ESTV) 28 novembru Becora realiza atividade empreendedorizmu ba estudante sira hodi halo reparasaun ba karteira eskolár ne’ebé a’at ho osan konsensaun eskolár hosi Ministériu Edukasaun Juventude no Desportu (MEJD).

Diretór Eskola ESTV Becora, Pedro da Silva Ximenes Belo, hateten, karteira eskolár ne’ebé a’at antes ne’e hetan apoiu hosi MEJD, maibé kadeira sira ne’e a’at hotu ona, entaun eskola kria programa empreendedorizmu hodi kapasita fali estudante sira nu’udar atividade ekstra kurrikulár ida.

“Ita iha kadeira a’at hamutuk 500, daudaun ita-nia estudante sira hadi’a ona 150 no ita sei hadi’a to’o ramata tanba ita atu prepara ba nesesidade tuir mai, kuandu simu estudante foun,” Diretór eskola informa ba Agência Tatoli, iha ninia knaar fatin, Becora, kinta ne’e.

Notísia relevante: MEJD prepara distribui karteira eskolár 20.000 ba eskola públiku 48

Nia dehan, atividade ekstra kurrikulár ne’e hala’o hosi estudante sira hosi departamentu haat hanesan eletrónika, eletrisidade informátika no ortográfika, ne’ebé atividade halo reparasaun ne’e hetan apoiu hosi osan hosi konsensaun eskolár ne’ebé Governu foin aloka ba eskola ne’e.

“Ita foin simu transferénsia osan hosi konsensaun eskolár hamutuk $2.280. Tanba ne’e ita hasai $400 hodi sosa triplex no tinta hodi halo reparasaun ba kadeira no meza a’at sira ne’e, maibé osan ne’ebé ita hasai ne’e la gasta hotu ida. Atividade ekstra kurrikulár ne’e eskola realiza iha de’it loron sábadu, ne’ebé hahú ona iha sábadu daruak, hein katak bele kontinua tan iha sábadu oin mai,” nia tenik.

Nune’e, Diretór Eskola ESTV 28 novembru husu ba Eskola Ensinu Sekundáriu Públiku sira karik iha kadeira no meza ruma ne’ebé a’at bele lori mai sira hadi’a tanba atividade sira ne’e atu ajuda estudante sira iha prosesu estájiu nia laran.

“Atividade hanesan antes ne’e hala’o ona hosi Eskola ESTV hosi grupu Teknolojia Indústria Bekora no eskola ne’e hetan apoiu kadeira no meza a’at hosi Ministériu, hafoin lori ba sira hadi’a, maibé prosesu reparasaun hotu ona agora hein de’it serimónia entrega maka seidauk realiza,” Diretór eskola esplika.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here