Diretór Ezekutivu SERVE, Florêncio Sanches. Imajen Tatoli/Jogerjo Guterres

DILI, 23 juñu 2022 (TATOLI)–Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio Sanches, hateten, iha empreza hamutuk 21 mak deside taka atividade iha tinan ne’e nia laran.

“Tinan ne’e SERVE, I.P foin taka empreza 21, kompara ho antes ne’e atus ba atus, empreza sira ne’e maioria ema estranjeiru. Sira deside taka tanba laiha rendimentu, laiha kbiit atu selu enerjia eletrisidade, rai, bee no funsionáriu,” Diretór Ezekutivu informa ba Agência Tatoli iha Timor Plaza, kinta ne’e.

Notísia relevante: SERVE, I.P halo verifikasaun ba ajénsia viajen halo rekrutamentu ilegál

Hodi empreza hirak ne’e, iha na’in-ida maka timor-oan, ho razaun taka tanba laiha kapitál no durante ne’e atividade negósiu mak halo meza no kadeira.

Nune’e, Diretór Ezekutivu ne’e apela ba empreza nasionál sira, bainhira laiha fundu atu kontinua hamoris sira-nia empreza, daudaun ne’e Governu prevee orsamentu hamutuk millaun $50 hodi ajuda empreza kiik sira maibé importante maka tenki prienxe kritériu sira ne’ebé estabelesidu.

“Governu kria ona polítika no prevee millaun $50 no husu atu empreza sira ne’e asesu ba fundu ne’e atubele kapitaliza sira-nia negósiu,” nia hameno.

Diretór Ezekutivu ne’e nota mós katak, timor-oan iha vontade boot tebes atu halo negósiu maibé susar iha kapitál.

Daudaun ne’e, SERVE, I.P rejista empreza 38.000 hosi totál ne’e empreza internasionál hamutuk 100- resin.

Jornalista : Antónia Gusmão

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here