Osan dolar Amérika. Imajen/Espesiál

OÉ-CUSSE, 22 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), lideradu Arsénio Paixão Bano, prevee millaun $25 hosi Orsamentu Jerál Estadu (OJE) 2022 hodi konstrui estrada rurál pakote I hosi sub-rejiaun Pante Makasar ba to’o Oénunu, suku Suni-Ufe, sub-rejiaun Nítibe.

Konstrusaun estrada rurál ne’e ezekuta hosi empreza internasionál PT Waskita Karya, ho valór kontratu millaun $23 ho durasaun serbisu durante fulan 22, nune’e iha fulan-juñu to’o jullu hahú faze konstrusaun.

“Estrada pakote primeiru, hosi Ponte Noefefan ba Oénunu fulan ida to’o juñu hahú konstrusaun ona, tanba manán na’in iha konkursu iha ona, empreza Waskita Karya mak manán entaun faze konstrusaun sei hahú iha fulan ne’e, bainhira remata mak faze kontinua ba faze daruak hosi Oénunu to’o fronteira Naktuka Citrana,” Prezidente Autoridade RAEOA, Arsénio ko’alia iha Oé-Cusse kuarta ne’e.

Ezekutivu ne’e, informa, kona-bá konstrusaun estrada hosi sub-rejiaun Pante Makasar ba sub-rejiaun Oésilo, tempu badak sei loke konkursu públiku, hodi konstrui estrada hosi eis merkadu Tono, suku Cunha to’o sub-rejiaun Oésilo.

“Konstrusaun estrada sira-ne’e ho nia serbisu tomak, peskiza estudu direita hosi primeiru prezidente autoridade, Mari Alkatiri, ho ekipa mak halo, akompaña hosi sub-rejiaun Pante Makasar ba to’o suku Bene-Ufe, fronteira Naktuka Citrana nomoos iha Oésilo,” nia afirma.

Nu’udar Prezidente Autoridade RAEOA, orgullu Oé-Cusse oan tenke serbisu hamutuk koopera ho autoridade hodi kontinua mellora prosesu dezenvolvimentu iha Oé-Cusse, atu hahú hadi’a ba futuru jerasaun.

“Serbisu sei barak ha’u husu povu Oé-Cusse ema barak sei mai serbisu, osan sei sirkula barak, ita-nia modo tenke aumenta, haki’ak animál tenke iha, tanba ema barak sei mai, osan ne’e tenke hela iha Oé-Cusse, ita tenke serbisu maka’as,” nia apela.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here