Kondisaun Eskola Bázika Filiál Lil-As. Imajen espesiál.

OÉ-CUSSE, 23 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), liuhosi Sekretária Rejionál ba Asuntu Edukasaun Solidariedade Sosiál Inkluzaun, aloka $30,893.73 hosi Orsamentu Jerál Estadu (OJE) 2022 ba projetu emerjénsia hodi reabilita Eskola Bázika Filiál (EBF) Lil-As iha rejiaun ne’e.

Konstrusaun reabilitasaun ba EBF Lil-AS ne’e ezekuta hosi empreza lokál Suni Lake Sombai, Unip, Lda. Enkuantu ba EBF sia (9) seluk daudaun ne’e sei iha prosesu konkursu sei publika iha tempu badak.

“Iha tinan 2022 ita hadi’a no halo manutensaun ba Eskola Bázika Filiál 10, tanba iha 2021 hetan dezastre naturál anin hú estraga tiha, entaun ita hatama iha planu manutensaun ba tinan ne’e, agora EBF Lil-As rezultadu konkursu públika, hein de’it atu halo lansamentu primeira pedra, ba EBF sia (9) seluk sei iha prosesu konkursu, hein publikasaun,” Sekretária Rejionál ba Asuntu Edukasaun Solidariedade Sosiál Inkluzaun, Avelina da Costa, hateten iha Oé-Cusse, kinta ne’e.

Nia informa, eskola 10 ne’ebé hetan dezastre naturál iha 2021, no hatama iha planu manutensaun ba tinan ne’e maka hanesan, EBF Lil-As, EBF Bimanu, EBF Fatukenfua, EBF Bona, EBF Oénunu, EBF Bebu Ulas Lama, EBF Mahata, EBF Nun-Ana no EBF Bimanu.

“Eskola sira-ne’e pendente iha tinan kotuk tanba ita la konsege halo konstrusaun entaun ita re-programa ba tinan ne’e, ita espera antes udan monu rai eskola sira-ne’e kompleta ona konstrusaun ba manutensaun, atu fasilita oan sira hala’o prosesu aprendizajen ho di’ak,” nia katak.

Jornalista: Abílio Elo Nini
Editór: Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here