Komisáriu AA/Alfándega, José António Fátima Abílio. Imajen Tatoli/Egas Cristóvão

DILI, 23 juñu 2022 (TATOLI)–Autoridade Aduaneira (AA)/Alfándega arrekada reseita alfandegáriu ba kofre Estadu hamutuk $35.377.025,53 durante fulan-lima (janeiru to’o maiu) iha tinan 2022.

Komisáriu Alfándega, José António Fátima Abílio, iha esperansa tinan ne’e ramata bele hetan reseita liu fali tinan kotuk (2021) ho montante millaun $67.

“Hosi fulan-janeiru to’o agora kontentór tama nafatin maski volume la hanesan ho situasaun normál. Entretantu taxa ne’ebé kobre kada kontentór depende ba kustu ne’ebé iha kontentór laran, ezemplu kontentór ida ho valór $500.000 entaun Alfándega kobre 5% hosi valór ne’e, ne’ebé hosi janeiru to’o maiu tinan ne’e reseita hamutuk millaun $35.377,” Komisáriu ne’e relata ba Agência Tatoli, iha ninia knaar fatin, eis edífisiu Ministériu Finansa, Palásiu Governu, kinta ne’e.

Notísia relevante: Alfándega iha sistema instaladu kontrola materiál plástiku importadu

Fonte reseita sira mai hosi portu, aeroportu, fronteira Batugade no Salele, inklui postu sira seluk hanesan Baucau no Ataúro maibé númeru kiik liu.

Taxa sira iha kategoria tolu hanesan taxa importasaun hamutuk $7.819.969,97, enkuantu taxa seletivu konsumu $18.759.447,10, taxa sobre venda $8.647.658,41. Aleinde ne’e kobre mós penalidade hamutuk $105.043,54, PFI importasaun no esportasaun $34.182.51 no OCD iha $10.724.

“Taxa importasaun boot liu maka taxa seletivu konsumu, ne’e iha item 10 de’it mak hanesan tua, serveja, sigaru, no karreta luxu,” nia akresenta.

Komisáriu dehan, Alfándega sempre enfrenta dezafiu bainhira halo kontrolu ba sasán importasaun sira, tanba loron ba loron iha importadór balun tenta hatama sasán ilegál ho maneira oin-oin.

“Tanba ne’e maka ita haree katak atu masimaliza kontrolu ne’e, Alfándega la servisu mesak maibé servisu hamutuk halo operasaun konjuta, nune’e bele tau atensaun tanba ita-nia fronteira terrestre no marítima ne’e luan, entaun Alfándega mesak labele,” nia haktuir.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here