Ema ho defisiénsia (EhD) sira bainhira partisipa iha workshop kona-bá sensibilizasaun Planu Nasionál ba Ema ho Defisiénsia ba Setór Edukasaun 2020-2024, iha salaun Infordepe, Balide, Dili, 01 Outubru 2020. Imajen António Gonçalves.

DILI, 23 juñu 2022 (TATOLI)—Diretór Ezekutivu Interinu Asosiasaun Halibur Difesiénsia Matan Timor-Leste (AHDMTL), Gabriel de Sousa, informa iha tinan 2022 ne’e AHDMTL labele rekolla dadus Ema ho Defisiénsia matan iha baze.

Notísia Relavante: MSSI sei harii Konsellu Nasionál responde PAN ba Ema ho Defisiénsia

“Tinan ne’e, ami-nia atividade rekolla dadus ema ho defisiénsia matan iha munisípiu sira paradu tanba osan la to’o. Nune’e mós atividade halo advokásia ba munisípiu labele la’o, la’ós la la’o hotu, maibé iha munisípiu balun la’o ne’ebé apoiu hosi parseriu sira,” nia dehan ba jornalista sira, hafoin hasoru malu ho Ministro da Presidência do Conselho de Ministros, Fidelis Manuel Leite Magalhães, iha Palásiu Governu, Dili, kinta ne’e.

Iha tinan ne’e, MSSI liuhosi Institutu Seguransa Sosiál (ISS) fó de’it orsamentu $44,504,046 no tinan 2021 fó orsamentu $603,296,058, entaun hosi montante ne’e hodi aluga uma ba ema ho defisiénsia matan feto no mane inklui ho eskritóriu AHDMTL nian ne’ebé agora uza daudaun ne’e.

“Osan ne’e la sufisiénte tanba seidauk haree ba ita-nia funsionáriu ne’ebé halo servisu, nesesidade membru iha koléjiu (asrama) no mós ba transporte ba sira (estudante defisiénsia) hodi asesu ba eskola loro-loron,” nia dehan.

Tanba ne’e, ekipa AHDMTL mai direita hasoru Ministro da Presidência do Conselho de Ministros, hodi hato’o preokupasaun ne’e, nune’e bele aloka osan atu bele reforsa orsamentu hosi MSSI nian ba AHDMTL.

Aleinde ne’e, AHDMTL mós planu sei hasoru ho Ministériu Justisa no Ministériu Edukasaun Juventude no Desportu (MEJD) atu fó hanoin nafatin ba asuntu ema ho defisiénsia sira.

Antes ne’e, Eis Diretór Ezekuitvu Asosiasaum Halibur Defisiénsia Matan Timor-Leste sesante, Gaspar Afonso, hateten tinan ne’e AHDMTL simu osan hamutuk $44,504 046 no tinan kotuk simu osan $ 603,296.058.

“Tinan ne’e, ami labele halo atividade barak tanba osan kiik tebes entaun osan hirak-ne’e ami hodi halo de’it ba aluga fatin ba labarik sira no nesesita nesesidade AHDMTL,” Gaspar Afonso hateten.

Tuir dadus, membru Asosiasaun Halibur Difesiénsia Matan Timor-Leste (AHDMTL) iha Timor-Leste hamutuk 14,828.

Notísia Relavante: MSSI ho MS Halo Konsultasaun Nível Ministeriál Ezbosu PAN Ba Ema Ho Defisiénsia

Jornalista :  Osoria Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here