ADRA halo konstrusaun irrigasaun Laefaek Hasan, iha suku Bibileo, kinta (23/06). Imajen Tatoli/Vitorino Lopes da Costa

VIQUEQUE, 23 juñu 2022 (TATOLI)-Organizasaun Internasionál Adventist Development and Relief Agency (ADRA) finaliza konstrusaun irrigasaun Lafaek Hasan ba natar ektar 45, iha suku Bibileo, postu administrativu Viqueque vila, munisípiu Viqueque.

“Foin lalais ADRA mai fó apoiu materiál sira hanesan semente, besi, no rai henek  hodi  ami halo konstrusaun ba irrigasaun Lafaek Hasan hodi benefisia natar ektar 45 iha suku Bibileo. Irrigasaun ne’e finaliza horiseik  (kuarta) no inaugura ona,” Xefe suku Bibileo, Maria Odete dos Anjos Amaral, hateten ba Agência Tatoli, iha Viqueque vila, kinta ne’e.

Notísia relevante: MAP Viqueque husu hadi’a sistema irrigasaun hodi hasa’e produsaun

Autoridade suku Bibileo konta tuir, durante ne’e halo natar balun maibé natar ektar 45 bee la to’o no sai abandona, daudaun irrigasaun hotu ona ne’ebé komunidade hahú halo atividade hodi sustenta família.

“Kona-ba apoiu sira hanesan osan ba konstrusaun irrigasaun ne’e ADRA la fó hatene ami, sira maka prepara materiál konstrusaun hotu maka fó hatene ami-nia komunidade hodi halo konstrusaun. Tanba ne’e, ha’u la hatene orsamentu ba konstrusaun irrigasaun ne’e,” nia akresenta.

Nia dehan, irrigasaun ne’e ho kualidade di’ak no sei uza ba tinan naruk, aleinde ne’e parte ADRA sei kontinua tau-matan ba irrigasaun.

“Nune’e ha’u husu komunidade tau-matan nafatin ba irrigasaun ADRA no komunidade halo produsaun haree iha rendimentu karik bele fa’an hodi sustenta ba família uma-laran,” nia hato’o.

Tuir dadus, populasaun suku Bibileo ne’ebé iha aldeia hamutuk ualu, moris ho vida agrikultura hamutuk 538, hosi totál populasaun família no totál  populasaun hamutuk 3.060.

“Ho nune’e, liuhosi irrigasaun ne’ebé harii ona ne’e sei benefisia ba ita-nia komunidade liuliu suku Bibileo ne’ebé halo natar Beasa Lafaek Hasan,” nia tenik.

Jornalista  : Vitorino Lopes da Costa

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here