Administradór Munisípiu Ataúro, Domingos Soares. Imajen Tatoli/Nelson de Sousa.

ATAÚRO, 23 juñu 2022 (TATOLI)—Administradór Munisípiu Ataúro, Domingos Soares, hateten administrasaun iha rekursu sufisiente hodi bele jere munisípiu foun ne’e.

Notísia Relevante: Administradór Ataúro fó prioridade ba edukasaun no saúde

“Rekursu umanu sufisiente tanba estrutura ne’ebé estabelese ba Ataúro la’ós estrutura uza hanesan ho munisípiu 12 seluk maibé ita halo agrupamentu iha servisu sira, ne’ebé rekursu umanu sufisiente. Tan ne’e, agora ita hein prosesu rekrutamentu bele hetan rekursu di’ak sira hodi bele mai prenxe estrutura,” Administradór ne’e hateten ba Agéncia Tatoli iha suku Maumeta Vila, munisípiu Ataúro, kinta ne’e.

Ba rekrutamentu mai prenxe vaga ba agrupamentu servisu rua mak ida iha servisu koorporativu no ida seluk presta servisu hanesan edukasaun, saúde, obra públika, transporte telekomunikasaun, saneamentu, rejistu notariadu no kadastrál, agrikultura, turizmu no komérsíu.

Nia informa, daudaun ne’e munisípiu Ataúro iha funsionáriu besik ema na’in-50 ne’ebé dedik-an hala’o servisu iha Administrasaun Munisipál.

Ataúro estabelese tuir lei iha 01 janeiru 2022 no momentu tranzisaun hodi halo nomeasaun ba administradór iha sekretáriu mai lidera ekipa ida hodi halo preparasaun sira hosi janeiru to’o 01 abríl, hafoin administradór atuál simu pose.

“Ne’ebé, ita agora iha faze instalasaun estrutura sira no atualmente utiliza rekursu sira-ne’ebé eziste hosi Ataúro-oan sira-ne’ebé antes hala’o knar iha Dili. Komu munisípiu Ataúro estabelese ona, ami Ataúro-oan sira iha kompromisu mai ho hanoin ida de’it dezenvolve rai ida-ne’e,” nia hateten.

Faze tuir mai estabelese ona administradór, sekretáriu eziste no iha mós diretór sira servisu  munisípál no  balun sei interinu, no agora daudaun iha prosesu ba rekrutamentu ajente administrasaun públika ba vaga 30 hodi bele prenxe estrutura ne’ebé atu instala.

VIII Governu Konstituisaun aprova projetu Dekretu-Lei liuhosi hala’o alterasaun datoluk ba Dekretu-Lei númeru 3/2016, 16 marsu, ne’ebé altera hosi Dekretu-Lei númeru 9/2018, 09 abríl, no númeru 54/2020, 28 outubru, ne’ebé kurije hosi deklarasaun retifikasaun Prezidénsia Konsellu Ministru númeru 4/2020,16 dezembru.

Iha Orsamentu Jerál Estadu (OJE) 2022, Governu prevee ona orsamentu ba Ataúro nu’udar munisípiu foun ho montante $2.508.100 ne’ebé kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha no transferénsia públika $304.271.

Administradór ne’e hateten, iha Orsamentu Jerál Estadu (OJE) 2022 Governu prevee ona orsamentu no prioridade ne’ebé presiza halo ba munisípiu foun ne’e mak konsentrasaun primeiru iha edukasaun, saúde, infraestrutura báziku liu-liu ba estrada tanba estrada hanesan preparasaun ba dezenvolvimentu turizmu, tanba Ataúro tuir Estadu nia previzaun sai hanesan destinu turístiku.

Nia inform, Ataúro ba parte eletrisidade iha suku rua hanesan Makili no Makadadi mak seidauk asesu liña eletrisidade maibé suku Makili iha ona prosesu instalasaun.

OJE 2022 ba Munisípiu Ataúro ne’e, hahú ezekuta ona maibé foin atinjr 3% no ezekusaun foka liu ba merenda eskolár ba alunu pre-eskolár no ensinu báziku, transferénsia públika ba subsídiu lideransa komunitária, fundu apoiu funsionamentu suku nian.

Notísia Relevante: Governu aprova Fundu Espesiál Dezenvolvimentu Ataúro

Potensialidade Ataúro primeiru mak turizmu, peska, budu tasi, agrikultura, produtu artezenatu, no pontésia ba biodiversidade iha tasi laran ne’ebé iha korál no ikan oioin.

Munisípiu Ataúro iha suku lima hanesan Beloi, Bikeli, Makili, Makadadi ho Maumeta Vila no  aldeia 19 ne’ebé ho iha populasaun hamutuk 11.700.

Xefe Suku, Filipe Ximenes, hateten kona-ba rekursu umanu sufisente entermus ema ho kbiit atu jere munisípiu foun ne’e ba oin no hanesan autoridade lokál prontu kontribui liu-liu  servisu sira iha adminsitrasaun suku ba programa dezenvolviementu.

Sente kontente Ataúro sai munisípiu Foun

Komunidade hosi suku Bikeli, Bonifacio Soares, sente kontente ho desizaun VIII Governu konstituisional deside Ataúro sai munisípiu.

Komunidade suku Bikeli, Munisípu Atauro, Bonifácio Soares. Imajen Tatoli/Nelson de Sousa.

“Ami Ataúro sente kontente ho desizaun Governu tanba durante ne’e ami hein desde tinan barak ona, nune’e bele fó kmaan ba servisu administrasaun tanba durante ne’e seidauk sai munisípiu ne’e presiza buat ruma tenke hakur tasi mak foin to’o Dili no dalaruma iha problema transporte ne’e susar la halimar,” nia dehan.

Ho desizaun ne’e bele lori dezenvolvimentu besik ba povu ne’ebé durante ne’e povu hein hela liu-liu kona-ba infraestrutura, bee-moos, eletrisidade no estrada.

Nia haktuir, antes ne’e eletrisadade lakan de’it iha oras lima ne’ebé akontese iha tempu kalan de’it maibé agora fornesimentu liña eletrisidade tempu loron iha no kalan to’o de’it tuku 00h00, nune’e hein katak tempu oin mai bele lakan to’o oras 24 nia laran.

Notísia Relevante: PN aprova kria Fundu Espesiál Dezenvolvimentu ba Ataúro

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here