Emanuel FC sai kampiaun hafoin joga ho Academi FC iha joga divisaun II, Liga Futeból Timor-Leste, tersa 7 Dezembru 2021, iha Estadiu Munisipal Dili, Imajen Tatoli/António Gonçalves

DILI, 23 juñu 2022 (TATOLI)— Federeasaun Futeból Timor-Leste (FFTL) no Liga Futeból Timor-Leste (LFTL), kinta ne’e, realiza enkontru hodi deside abertura jogu primeiru no segunda divizaun époka 2022, iha loron 18 agostu tinan ne’e.

Biban ne’e, Sekretáriu Jerál Federasaun Futeból Timor-Leste (FFTL), Gregorio Correia, hateten, abertura jogu primeira divizaun no segunda divizaun tenke tuir kalendáriu Federation International Football Association (FIFA) no Asian Football Confederation (AFC) nian.

“Hakarak ka lakoi 18 agostu ne’e liga la’o tanba iha juñu no jullu ne’e, eventu internasionál iha li’ur barak ne’ebé jogadór barak sei partisipa. Ne’ebé difikulta klube sira  nia jogadór barak mak envolve, nune’e agostu mak hahú abertura tanba atividade internasionál laiha,” dehan Gregorio ba Jornalista-sira iha edifísiu FFTL, kinta ne’e.

Iha enkontru ne’e, lideransa Liga Futeból Timor – Leste (LFTL) ko’alia ho Sekretáriu Estadu Juventude no Desportu (SEJD) no FFTL ko’alia preparasaun no orsamentu ba liga ne’e.

Iha biban hanesan, Diretór Relasaun Públiku LFTL, Diogo Neto Fraga, hateten enkontru entre parte rua deside atu realiza jogu primeiru no segunda divizaun iha fulan agostu.

“Ita hamutuk haree atu aseleira prosesu sira hodi bele hahú liga iha agostu nia laran, sé buat hotu loos ona janela transferénsia ba klube sira atu halo rekrutamentu ba jogadór lokál no internasional hahú ona iha jullu nia-laran,” nia afirma.

Entretantu, Sekretáriu Jerál Klube Primeira Divizaun Karketu Dili FC, Eliseu Isaac, hateten sira nia parte seidauk halo preparasaun ba liga époka ne’e tanba seidauk hetan informasaun klaru hosi LFTL no FFTL kona-ba data fiksu atu hahú liga.

“Ami too agora seidauk simu informasaun ruma, maibé sei parte rua halo ona enkontru hodi deside loron liga nian, sira tenke kria fali enkontru ida ho ami klube sira hotu para ami bele hatene loos kona-ba loron fiksu hahú liga. atu ami fó kontratu ba jogadór -sira,” nia afirma.

Sekretáriu Jerál ne’e agradese ba parte rua LFTL no FFTL bele koopera malu ona hodi realiza liga iha agostu, nune’e hadi’a jogadór-sira bele hadia-nia talentu.

“Ami preparadu no pronto nafatin partisipa liga no sei buka tan jogadór balun hodi rekruta tanba kritéria tenke jogadór minimu 18 no másimu 21,” nia akresenta.

Ekipa kapital Dili ho simbulu manu Lakateu ne’e hanesan ekipa ne’ebé úniku sai kampiaun dala-rua ona ba liga futeból.

Kampiaun primeiru iha tinan 2017 ne’ebé liga sei ho naran Liga Futeból Amadora (LFA) bainhira LFA transforma ba LFTL liga primeiru Karketu mak sai kampiaun primeiru iha 2021.

Molok ne’e, Liga Futeból Timor-Leste (LFTL), loke ona janela transferénsia ba klube 19 ne’ebé hamahan-an iha LFTL hodi halo rejistu ba jogadór, nune’e bele partisipa iha liga époka ne’e tuir kritéria no oráriu   Asian Football Confederation (AFC).

LFTL husu ba klube hotu atu hakbesik-an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Alende ne’e, iha jogu tasa 12 Novembru sei joga hosi klube 19 no nafatin hosi sistema vota fora ou lakon sai hamutuk jogu 18.

Klube 19 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu, Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Notísia relevante:  LFTL preparadu realiza liga futeból époka 2022

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here