Xefe suku Lour, postu administrativu Bobonaro, munisípiu Bobonaro, Miguel Lopes Gomes. Imajen Tatoli/Sérgio da Cruz.

BOBONARO, 22 juñu 2022 (TATOLI) – Xefe suku Lour, postu administrativu Bobonaro, munisípiu Bobonaro, Miguel Lopes Gomes, konsidera insentivu $250 ne’ebé Parlamentu Nasionál (PN) aprova iha Orsamentu Jerál estadu (OJE) tinan 2022 lori kontente no triste.

“Insentivu $250 ne’ebé ami simu lori kontente no triste dala-ida, tanba sá hau hateten hanesan ne’e, primeiru ami kontente tanba halo mudansa ona, maibé segundu ami trsite tanba parlamentu ho governu foin mehi ami-nia mandatu besik remata ona mak hasa’e ami-nia insentivu, nusá durante ami asume kargu hanesan xefe suku lakohi aumenta kedas,” nia informa Agência Tatoli, iha Maliana, kuarta ne’e.

Maske nune’e nia mós apresia no agradese ba VIII Governu Konstituisionál tanba kumpre ona sira-nia promesa ne’ebé publika ona iha Jornál Repúblika hodi aumenta tán saláriu no nia sente katak sufisiente oituan ba sira tanba dezde mandatu tinan haat nia laran simu de’it $140.

Maibé Autoridade suku ne’e haktuir, tinan ne’e iha primeiru períodu hahú hosi fulan- janeiru, fevereiru to’o marsu sira nafatin simu insentivu atuál.

“Foin lalais ne’e faze daruak nia mak ami foin simu kompletu, ami-nia insentivu ne’ebé ita-nia governu ho Parlamentu Nasionál ho fuan boot halo mudansa ami-nia insentivu atuál $140 hasa’e ba $250, agora transfere ona mai ami-nia konta suku, ha’u foti ona horibainrua,” nia katak.

Xefe suku iha munisípiu Bobonaro hamutuk na’in-50, mai hosi postu administrativu Aatabe na’in-haat, Balibo neen, Cailaco ualu, Maliana hitu, Bobonaro 18 no postu administrativu Lolotoé hamutuk hitu.

Antes ne’e, iha loron 15 fulan juñu, Ministru Administrasaun Estatál (MAE), Miguel Pereira de Carvalho, hateten bainhira membru konsellu suku eleitu iha 2004 hahú ho subsídiu sira ho valór $15.

Ho alterasaun subsídiu akontese iha 2012 no halo revizaun iha tinan 2014 konsege hasa’e insentivu subsídiu ba xefe suku sira ho $140 no to’o agora halo ona tinan hitu tempu ona presiza hasa’e insentivu ba líder komunitária sira.

Tuir dadus, iha territóriu nasionál ne’e xefe suku sira hamutuk 452 no hosi suku 452 ne’e, xefe aldeia hamutuk 2,233, pesoál apoiu administrasaun suku hamutuk 452, delegadu ka delegada no lia-na’in hamutuk 5,822 ne’e inklui Rejiaun Administrativa Espesiál Oé-cuse Ambeno (RAEOA).

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan