Komunidade sira tuur hela atu konsulta no halo tratamentu iha Klínika Bairru-Pité,segunda 7/3/2022.Imajen Tatoli/Antonio Dasiparu

DILI, 22 juñu 2022 (TATOLI)— Ministériu Saúde (MS), tersa ne’e, selebra akordu ho Klínika Bairru-Pité (KBP), hodi apoia fundu $68.000 hodi kontinua fó atendimentu saúde ba pasiente sira.

Biban ne’e Ministra Saúde, Odete Maria Freitas Belo, hateten asina ona akordu ho Klínika Bairru-Pité atu hala’o transferénsia fundu ho valór $68.000 atubele ezekuta no hala’o serbisu saúde públika.

Ministra Saúde, Odete Maria Freitas Belo. Imajen Tatoli/Francisco Sony

“Ami asina ona kontratu ho sira (Klínika Bairru-Pité) atu apoia orsamentu $68.000 ba sira, nune’e espera katak Diresaun Nasionál Finansa bele halo transferénsia   lalais ba konta bankária Klínika Bairru-Pité, hodi fasilita funsionamentu klínika ne’e ba atendimentu saúde ba komunidade sira,” Ministra Saúde hateten ba Agência TATOLI, iha knaar fatin, kuarta ne’e.

Governante ne’e informa antes ne’e MS mós transfere ona orsamentu $68.000 ba Klínika Bairru-Pité no iha tinan ne’e (2022) transfere fali $68.000.

Alende ne’e, MS mós selebra akordu renovasaun lisensa importasaun ai-moruk ho Klínika Bairru-Pité atubele hafasil  

Diretór Ezekutivu Klínika Bairru Pité (KBP), Inacio do Santos, .Imajen Tatoli/Antonio Dasiparu

Iha fatin ketak, Jestór Klínika Bairru-Pité Inacio do Santos, informa Ministériu Saúde asina akordu hodi apoiu finanseira ho valór $68.000 hodi fasilita serbisu atendimentu saúde ba komunidade sira.

“Ami asina ona akordu ho Ministériu Saúde atu apoiu finanseiru hamutuk $68.000 ba atividade iha klínika ne’e rasik, maibé ho orsamentu ne’e nafatin la sufesiente,” nia afirma.

Nia temi katak, antes ne’e sala baixa mós taka, sala partus nian, inklui tratamentu espesífiku balun, tanba hasoru krize finanseiru.

Totál atendimentu ne’ebé halo iha klínika Bairru-Pite  mak hanesan, atendimentu kuidadu saúde primária, konsulta ambulátoriu, internamentu baixa, izolamentu ba moras TBC, partu, kuidadu imunizasaun, serbisu sosiál feto, má-nutrisaun, dentaria, farmásia, laboratóriu, sala emerjénsia, HIV-SIDA, lepra no kankru raan.

Nia dehan, atividade iha Klínika Bairru-Pité ne’e barak mak durante ne’e suspende tanba orsamentu mai la tuir proposta ho montante $236.000

“Orsamentu ne’ebé mai ne’e aloka rihun $68 de’it, nune’e la sufisiente ita loke baixa, atendimentu programa má-nutrisaun no partu tanba presiza funsionáriu barak ho orsamentu barak,” nia afirma.

Kona-ba estoke ai-moruk, nia dehan, sufisiente hela atu bele halo tratamentu ba pasiente sira hosi fatin atendimentu hirak ne’ebé temi ona.

Notísia relevante:  Krize finanseiru, Klínika Bairru Pité deside taka sala baixa no Maternidade

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here