Aviaun Qantas. Imajen TATOLI/António Gonçalves

DILI, 22 juñu 2022 (TATOLI)–Prezidente Komisaun Juventude Katólika Arquedioseze Dili (COJUCAD) interinu, Padre Cirilo dos Santos Maia, husu ba ajénsia ne’ebé organiza joven serbisu iha rai-li’ur atu hatudu responsabilidade no labele abandona joven sira bainhira iha ona rai-li’ur.

“Ha’u hatene katak ajénsia sira ne’e iha hanoin di’ak atu apoiu ita-nia joven sira hodi bá serbisu iha rai-li’ur, maibé ha’u husu mós ba sira atu iha responsabilidade hodi labele impede fali joven sira bainhira iha ona rai-li’ur,” Prezidente COJUCAD interinu informa ba Agência Tatoli, iha Dioseze Dili, Bidau Lecidere, kuarta ne’e.

Notísia relevante: Timoroan na’in-hitu “terus” hela iha Dubai

Antes ne’e, Padre Cirilo ne’ebé tau-matan ba sarani juventude Katólika iha Arquedioeseze Dili ne’e konfesa katak, rona iha joven lubuk, hafoin ajénsia balun fasilita bá serbisu iha Portugal maibé to’o iha ne’ebá hasoru fali problema.

“Loloos ida-ne’e labele akontese. Husu ba ajénsia sira iha kooperasaun ho Estadu no Governu tanba timor-oan sira ne’ebé sai serbisu iha rai-li’ur mesak joven ho idade produtivu no sarani katólika de’it. Riin nasaun nian maka Estadu, ne’ebé ajénsia sira bele halo buat hotu maibé labele haluha tenke halo koordenasaun di’ak ho Governu atu labele impede fali joven sira-nia serbisu iha rai-li’ur,” nia akresenta.

Líder Relijiozu ne’e dehan, joven sira ho idade produtivu iha ona hanoin di’ak hakarak ba serbisu iha rai-li’ur hodi sustenta nesesidade no ekonomia família no nasaun, tanba ne’e bainhira ajénsia ne’ebé iha ona hanoin atu ajuda joven sira bá serbisu iha rai-li’ur tenke ajuda ho fuan no laran tomak.

“Labele halo fali joven sira hasoru problema hanesan iha Portugal maibé tenke iha kooperasaun di’ak ba malu. Igreja ninia esperansa maka husu bá timor-oan hotu tantu iha ajénsia no joven sira atu kuidadu nafatin dignidade nasaun inklui dignidade umana,” nia fó hanoin.

Aleinde ne’e, Amu ne’e apela ba inan-aman atu nafatin iha responsabilidade, tanba Estadu no igreja atu la’o di’ak tenke hetan apoiu formasaun hosi família no edukasaun.

“Ita boot sira labele kontente de’it tanba oan sira ba serbisu iha rai-li’ur, maibé kontinua fó nafatin motivasaun no formasaun orál ba sira liuhosi komunikasaun nu’udar sentru di’ak ida ba oan sira-nia futuru,” nia tenik.

Preokupasaun igreja maka haree liu ba klamar ne’ebé COJUCAD iha, ho liña koordenasaun ho família sira.

Tanba ne’e, hosi formasaun ne’ebé Arquedioseze Dili realiza ho tema jerál ne’ebé ko’alia kona-ba eukaristia no ekolojia klamar nian, nune’e daudaun ne’e igreja hala’o hela sosializasaun ba universidade sira liuhosi Krús universitáriu nian ne’ebé iha hela Instituto Superior Cristal (ICS), hanesan maneira ida atu fanu estudante sira katak bele halo buat hotu maibé klamar ne’e importante.

“Ho nune’e, maski iha preokupasaun oin-oin, igreja nunka taka matan no taka ibun. Igreja sempre nafatin preokupa joven sira-nia moris, liu-liu ba sira ne’ebé buka serbisu iha rai-li’ur, maibé labele haluha fó han nafatin klamar sira ho ai-han eukaristia,” nia hameno.

Jornalista : Tomé Amado  

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here