Konstrusaun sala-de-aula tolu no haris fatin ida iha Eskola Sekundáriu Jerál Pùbliku Suai, atinje ona 37%. Imajen Tatoli/Celestina Teles.

COVALIMA, 22 juñu 2022 (TATOLI)–Projetu sala de aula tolu no haris fatin ida iha Eskola Sekundáriu Jerál Públiku (ESGP, sigla portugés) Suai ne’ebé lokaliza iha aldeia Lokeu, suku Debos, postu administrativu Suai Vila, Munisípiu Covalima ne’e atinje ona 37%.

Notísia Relevante: Prosesu konstrusaun-reabilitasaun eskola 15 iha Covalima hahú tinan ne’e

“Ami hetan projetu konstrusaun uma-foun ho sala-de-aula tolu (3) no haris fatin ida. Ami foti fundu iha loron 28 janeiru 2022 ho totál 25% ne’ebé ekivalente ho osan hamutuk $25,226,6. Progresu servisu tuir kalkulasaun hosi tékniku kontrusaun atinje ona 37%,” Prezidente Grupu Komunitária, Francelino Freitas de Carvalho, relata progresu konstrusaun ba Agência Tatoli iha nia knar fatin, tersa ne’e.

Projetu konstrusaun sala-de-aula tolu ho haris fatin ida ne’e, hahú implementa iha fulan-janeiru ho nia durasaun tempu konstrusaun to’o fulan neen (6). Daudaun ne’e, parte eskola hein hela prosesu levantamentu orsamentu 50% ne’e.

“Agora ami hein hela prosesu levantamentu orsamentu 50% hosi Governu maibé orsamentu seidauk bele foti, maske eskola rasik hato’o ona progresu servisu no relata relatóriu gastu orsamentu ne’ebé mak ami gasta ba 25% ne’e,” nia dehan.

Tuir kontratu, implementasaun projetu ho karáter komunitária finaliza iha fulan-juñu ne’e maibé prosesu tomak fila ba ministériu. Daudaun ne’e, eskola sei hein pedidu levantamentu orsamentu 50% hosi Governu hodi bele finaliza lalais obra ne’e.

“Projetu Konstrusaun no Reabilitasaun Eskolar (PKRE) ami hein de’it ona orsamentu 50% hosi Governu. Osan laiha ona oinsá ami bele kontinua tanba ami labele hasai ami-nia osan privadu,” nia dehan.

Tuir matadalan hateten, orsamentu 25% labele halo pagamentu ba badaen sira maibé eskola rasik halo jestaun hosi fundu ne’ebé iha no eskola fasilita badaen sira tanba sira iha nesesidade iha uma laran.

Ministériu Edukasaun Juventude no Desportu (MEDJ) entrega obra ne’e liuhosi Projetu Konstrusaun no Reabilitasaun (PKRE) ho nia karáter komunitária. Projetu ne’e ho durasaun tempu fulan-neen ho totál orsamentu $25,226,6.

Implmentasaun projetu komunitária ne’e utiliza orsamentu jerál estadu 2021 no iha munisípiu Covalima sei reabilita eskola hamutuk 15 ne’ebé prosesu la’o kle’ur, entaun nia implementasaun la’o to’o tinan 2022.

Tuir dadus hosi Edukasaun Munisípiu Covalima tinan kotuk hatudu katak, sei konstrui no reabilita eskola 15 no grande projetu ida iha munisípiu Covalima.

Hosi Projetu Konstrusaun no Reabilitasaun (PKRE) ne’e, sei reabilita no konstrui eskola sira hanesan EBF Holbolu, Laen Tolu, Maucola, Eskola Téknika Vokasionál Akar Laran, Eskola Sekundária Jeral Públiku Suai, EBC Zumalai, EBF Salasa, Icecai, Soiliga, Aitos, Macocon, Has Ain, EBC Fatumea, Traducama konstrui no reabilita eskola sala-de-aula kompleta ho eskritóriu, armajen no toilet.

Notísia Relevante: Komunidade Suai Loro hulan materiál konstrusaun hodi hari’i eskola

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here