Vise-koordenadora grupu Feto Uani-Uma, Benedita Soares Guterres. Imajen Tatoli/Vitorino Lopes da Costa

VIQUEQUE, 22 juñu 2022 (TATOLI)–Vise-Koordenadora grupu Feto Uani-Uma, Benedita Soares Guterres, hateten, grupu hosi aldeia Uani-Uma, suku Matahoi, postu administrativu Uatulari, munisípiu Viqueque iha ona planu atu prodús tais.

“Durante ne’e ami livre hela, la halo buat ida, entaun ami harii tiha grupu Feto Uani-Uma iha tinan 2022, ami hahú konsentra hamutuk hodi prodús tais. Ami-nia planu semana ne’e ami hahú halibur hamutuk osan hodi sosa kabas prodús tais,” Vise-Koordenadora grupu informa ba Agência Tatoli, iha aldeia Uani-Uma, suku Matahoi, kuarta ne’e.

Notísia relevante: KHK no komunidade suku Uma-Quic Viqueque kuda ai-oan 1.000

Nia dehan, semana ne’e sei halibur hotu osan hosi membru hodi sosa kabas no fahe ba feto maluk sira ne’ebé hatene soru tais hodi hahú prodús tais.

“Ami mós esforsu hodi lori grupu feto Uani-Uma la’o ba oin no hametin liu tan ami-nia grupu, ami lakoi grupu ne’e kotu iha tempu badak nian laran. Iha grupu ne’e membru feto hamutuk na’in-15. Bainhira grupu ne’e prodús ona tais, sei fa’an ba merkadu hodi hetan ninia rendimentu atu haboot liután produsaun no balun sustenta ba família uma-laran,” nia akresenta.

Aleinde planu soru tais, antes ne’e grupu Feto Uani-Uma halo ona atividade rai osan no ortikultura hanesan kuda kanku no modo mutin.

“Ami-nia grupu rai osan durante fulan-tolu ona, daudaun ne’e ami-nia osan ne’ebé rai, ami rasik maka foti, ema seluk seidauk mai empresta ami-nia osan. Atividade rai osan ne’e ami sente di’ak ba ami tanba fasil atu ami foti osan,” nia haktuir

Durante ne’e K’nua Haberan Komunidade (KHK) maka fasilita formasaun kona-ba rai osan no apoia ortikultura ba grupu feto.

KHK mós fó apoiu fundu $1.000 ba grupu ne’e hodi haforsa rai osan no empresta inklui apoia fini modo mutin, kanku no fore talin.

Autoridade Uatulari enkoraja grupu feto prodús tais

Administradór Postu Uatulari, Manuel do Rosário, enkoraja grupu feto hosi postu Uatulari, munisipiu Viqueque hodi prodús tais tanba nu’udar identidade kulturál iha kada postu.

“Ha’u husu feto maluk sira hosi postu Uatulari prodús tais Uatulari nian, tanba tais nu’udar identiku kulturál. Dala barak ita uza tais hosi fatin seluk lori mai habelar fali iha postu Uatulari, ida-ne’e ita habelar ema seluk nian produtu. Ha’u hakarak ita-nia tais rasik atu ema seluk mós bele habelar tutan iha fatin seluk no hatene tais hosi Uatulari maka oinsá,” Autoridade munisipál ne’e dehan.

Aleinde ne’e, bainhira prodús tais, aban bainrua ema ruma mai vizita bele sosa iha grupu feto sira no la presiza ona tais hosi fatin seluk.

“Durante ne’e, ema boot sira mai ita sosa tais hosi ema seluk maka barak liu, kompara ho ita-nia produtu rasik. Tanba ne’e, ita presiza habelar ita-nia tais ho idéntiku Uatulari ho ida-ne’e ha’u enkoraja feto sira, se ita uza ema seluk nia produtu tais nafatin, ita rasik halakon ita-nia identidade,” nia fó hanoin.

Tuir nia, prezerva kultura ba futuru sai identidade postu Uatulari, tanba ne’e tempu agora tenki prepara hodi habelar identidade.

“Husu ba feto foin-sa’e sira tenki buka apreende ho inan sira, hodi  hatene soru tais. Bainhira imi lakoi apreende soru tais agora, imi sei la hatene buat ida no imi sei garante maka tais sira hosi munisípiu seluk nian,” nia hameno.

Jornalista : Vitorino Lopes da Costa

Editora     :  Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here