Embaixadór Austrália iha Timor-Leste, Bill Costello. Imajen TATOLI/Francisco Sony.

DILI, 22 juñu 2022 (TATOLI)—Governu Austrália liuhosi Embaixadór Austrália iha Timor-Leste, Bill Costello, hato’o kompromisu atu hametin di’ak liután ho veteranu Timor-Leste no mós sei apoiu programa sira-ne’ebe mak MACLN trasa ona.

Notísia Relevante: Rekerrente bolsa estudu ba veteranu nia oan 1,548 iha faze ajustamentu

Nia hatutan, Governu Austrália sei fó apoiu liu-liu kona-ba programa ba edukasaun liuhosi bolsa estudu ba veteranu no martires nia oan sira.

“Governu Austrália mós prontu fornese bolsa estudu ba veteranu no martires nia oan sira,” refere komunikadu imprensa ne’ebé Agência Tatoli asesu, kuarta ne’e.

Kestaun ne’e hato’o hafoin Ministru Asuntu Kombatente no Libertasaun Nasionál (MACLN, sigla portugés), Júlio Sarmento da Costa “Meta Mali”, hasoru malu ho Embaixadór Austrália ihaTimor-Leste, Bill Costello, ne’ebe akompañadu hosi Adidu Militár Embaixada Australia, Colonel Paul Pembroke, iha edifísiu MACLN iha Rumbia, Caicoli, Dili.

Júlio Sarmento da Costa “Meta Mali” hateten, sorumutu ne’e ko’alia kona-ba importante relasaun bilaterál entre Timor-Leste ho Austrália ne’ebé di’ak tebes tanba iha tinan rua nia laran asume kargu nu’udar MACLN simu ona vizita hosi reprezentante Governu Austrália liuhosi Embaixada ba datoluk ona.

Entretantu, Ministru Asuntu Kombatente no Libertasaun Nasionál (MACLN, sigla portugés), Júlio Sarmento da Costa “Meta Mali”, hato’o agradesimentu ba Governu Austrália atu bele fó mós biban ba veteran no martires nia oan sira liuhosi programa bolsa estudu.

Governante ne’e apela ba veteranu no martires nia oan sira atu buka aprende di’ak liután lian Ingles no hasae kualidade iha koñesimentu téknika no abilidade iha área si’ensia no sosiál, atu nune’e bele ba estuda iha universidade sira iha Austrália.

Nia hatutan, dyrante ne’e relasaun di’ak entre veteranu Austrália no Timor-Leste di’ak tebes tanba relasaun istóriku entre rai rua ne’ebe di’ak tebes hahú hosi II Guerra Mundiál no tinan 1942 iha Timor-Leste, timoroan barak mós fó tulun ba soladu Austrália nian hodi funu kontra Japaun sira.

Jornalista : Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here