Inan-feton sira-ne’ebé organiza hosi Fundasaun Aloka soru hela tais tradisionál, segunda (30 maiu 2022). Imajen Tatoli/Antonio Daciparu.

DILI, 22 juñu 2022 (TATOLI)—Diretora Ezekutivu Fundasaun Alola, Maria Imaculada Guterres, informa tuir planu iha tinan ne’e Fundasaun Alola sei estabelese rede soru tais iha munisípiu Baucau no Viqueqeu.

Notísia Relevante: PM lansa rekuñesimentu “tais” sai patrimóniu kulturál mundiál

“Tuir planu iha tinan ne’e, ami sei harii rede soru tais iha munisípiu rua hanesan Baucau no Viqueqeu,” Maria Imaculada Guterres hateten ba Agência Tatoli, iha nia knar fatin, Díli, tersa ne’e.

Estabelesimentu rede soru tais ne’e hanesan projetu konsórsiu ida-ne’ebé Fundasaun Alola servisu hamutuk ho Timor AID liuhosi apoiu UN Women.

“Agora daudaun Fundasaun Alola hamutuk ho Timor AID ami desde tinan kotuk hala’o hela projetu konsórsiu ida-ne’e atu estabelese rede soru tais iha munisípiun sira. Ita konsege halo ona iha munisípiu haat (4) hanesan Lospalos, Covalima, Oé-Cusse no Bobonaro. Nune’e, espera ba tinan hirak mai ho apoiu nafatin hosi doadór sira, ami bele estabelese iha munisípiu sira hotu,” Diretora Alola ne’e dehan.

Projetu konsórsiu ne’e, hanesan meiu ida atu bele haforsa ka hatutan feto soru-nain sira-nia lian iha nível nasionál, liu-liu kona-ba sira-nia direitu de autór, ba motif ne’ebé sira-na’in rasik iha, hanesan bei’ala sira iha kada munisípiu, oinsá bele asegura ida-ne’e.

Tanba, nia dehan, se lae mak hanesan agora mosu tais printing no ema Xina sira mós komesa na’ok Timor-Leste nia motif sira ba kopia no mai faan ho folin ne’ebé baratu tebes, ho laiha koñesimentu hosi tais na’in ka autór sira liu-liu inan-feton sira ne’ebé badaen ba soru tais ne’e.

Aliende ne’e, objetivu harii rede soru tais iha munisípiu ne’e atu bele iha rede ne’ebé forte liu-liu n soru-na’in sira atu hatene motif ne’e orijinál sira-nian duni, no bainhira ema ruma viola ne’e sira iha direitu atu reklama no hato’o keixa, nune’e Governu bele tau matan ba asuntu ne’e hodi rezolve.

Maske nune’e, nia afirma, projetu konsórsiu ne’e Fundasaun Alola hamutuk ho Timor AID bolu reprezentante munisípiu ne’ebé iha nível munisípiu, atu mai hamutuk hodi forma sai hanesan grupu ida.

“Ida ne’e baibain ita servisu hamutuk ho autoridade lokál sira, atu bele rekuñese grupu soru na’in sira, atu mai hamutuk no forma sai grupu munisípiu hodi reprezenta sira-nia Munisípiu. Nune’e, motif hira iha munisípiu ne’e bele reprezenta ona iha grupu nia laran, atu ida-idak koñese ninia motif tais tuir identidade hosi munisípiu ida-idak ni’an. Karik ema ruma na’ok sira-nia motif tais hosi munisípiu ne’e, sira mak iha direitu atu reklama,” nia dehan.

Daudaun ne’e, membru rede soru tais iha munisipiu haat (4) ne’ebé eziste iha Lospalos 47, Oé-Cusse 60, Covalima 50 no Bobonaro 50.

Haafoin estabelese rede soru tais iha munisípiu hirak ne’e, Fundasaun Alola no Timor AID sei fó mós formasaun ba partisipante sira, no máteria ne’ebé fó durante iha formasaun mak naturál dying, sura kabas, tetu kabas no soru tais. Nomós kona-ba líderansa no violénsia bazea ba jéneru.

Nune’e, iha formasaun ne’e partisipante sira interese tebes, tanba iha momentu esplikasaun katak la’ós haree hosi tais nia kuantidade maibé haree hosi nia kualidade mak importante.

“Ezemplu, ema sosa-na-in haree liu ba kualidade kompara ho nia kuantidade. Se nia hola uza la kle’ur nia koor sai, aat lalais, nia nakloke no kabaas kore an ida-ne’e tempu tuir mai ema la hola ona no laiha ona konfiansa ba soru-na’in sira. Entaun ita hanorin sira kona-ba oinsá garante kualidade produsaun, diversifikasaun produtu, atu nune’e atrai ema hola ho modelu oioin,” nia hateten.

Hosi esperiénsia Fundasaun Alola realiza feira iha tempu paskua no natal ne’e, soru-na’in nia númeru partisipasaun aumenta no sira sempre hetan rendimentu. Hein katak kapasitasaun ne’e importante liu-liu diverfisikasaun produtu atu labele halo ema baruk atu hola, maibé oinsá dada ka atrai sosa-na’in sira atu bele hola barak liután, nune’e halo sira atu kontinua prodús tais ba oin.

Notísia Relevante: SEAK sei fó formasaun kona-ba soru tais ba jerasaun foun sira

Maske nune’e, iha formasaun ne’e, Fundasaun Alola hasoru dezáfiu hanesan fundu tanba atu viájen hodi indentifika no harii grupu foun sira-ne’e presiza fundu atu viájen, hanesan ense mina ba karreta no viájen funsionáriu nian.

Nia dehan, realidade iha terrenu hatudu katak joven sira ladún iha inisiativa partisipa iha prosesu formasaun liu-liu soru tais, entaun ida-ne’e hanesan ameasa boot ida ba Timor-Leste tanba hanesan iha terrenu ne’e inan-feton otas nakaras mak tuir formasaun no foinsa’e sira laiha.

“Bainhira inan-feton sira otas boot ona nia tempu liu ona munisípiu ne’e oinsá, maibé ami koko konvida nafatin no enkoraja foinsa’e sira liuhosi autroidade lokál atu identifika ho ministériu relevante no sosiedade sívil sira-ne’ebé servisu iha área hanesan, atu bele enkoraja feto foinsa’e sira aprende mós soru tais liuhosi formasun ne’ebé ita fó,” nia dehan.

Solusaun ba dezafiu ne’e mak oinsá Governu liuhosi Ministériu Edukasaun Juventude no Desportu (MEJD) atu bele tau ona prosesu soru tais, inklina iha kuríkulu no matéria ba estudante Pr­e-sekundária no Sekundária sira, atu bele aprende no garante kontinuasaun no prezervasaun tais iha futuru, nune’e identidade kultura Timor-Leste nian labele lakon.

“Esperansa boot liu iha formasaun maka ita-nia tais ba oin timor-oan tomak sei iha konsiénsia atu promove tais nu’udar ita-nia identidade kultura. Esperansa boot liu, ba ita-nia Governu atu bele rekoñese no halo lei ida ba iha tais ne’e uza hanesan uniforma kada semana ida hatais dala rua, atu nune’e tane feto sira atu kontinua prodús beibeik taos. Tanba se ema la hola, sira mós prodús uitoan no foinsa’e mós lakohi aprende ona, tanba ema menus kompra,” nia dehan.

Espetasaun boot, mak tais ne’e timor-oan hotu esforsu atu labele lakon no kontinua promove, tanba tais sai hanesan patrimóniu kulturál mundiál entaun timor-oan iha rai-laran tenke servisu hamutuk atu bele promove nafatin, liu-liu haforsa estabelese rede soru tais nia lian labele lakon no ema sira-ne’ebé viola iha lei tenke multa.

Entretantu, prosesu estabelese rede soru-nain ne’e mak liuhosi sensibilizasaun ba líder lokál no servisu hamutuk ho pontu fokál, feto potensiál munisipiu nian, Sekretáriu Estadu Arte no Kultura (SEAK), Ministériu Turismu Komérsiu no Indústria (MTCI) no Sekretária Estadu Igualdade no Inkluzaun (SEII).

Notísia Relevante: MTCI sei realiza kompetisaun soru tais ba jerasaun foun sira

Tais sai patrimónia mundiál, SEAK fó prioridade apoia grupu soru tais

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here