Kampus IOB iha Dili. Imajen/IOB

DILI, 22 juñu 2022 (TATOLI)–Ekonomista hosi Institute of Bussiness (IOB), Juvião Xavier, preokupa ho polítika partidária hahú organiza joven sira sai bá rai-li’ur hodi buka serbisu, tanba ne’e husu ba Governu atu buka hatene ligasaun no koordenasaun entre grupu partidária no ajénsia iha rai-li’ur.

“Iha joven barak mak ohin loron bá serbisu iha rai-li’ur tanba ein kaixa-an iha programa Governu no tanba família sira mak apoiu finanseiru, maibé iha mós polítika partidária ka organizasaun balun halo hanesan ne’e Governu tenke toma responsabilidade. Ita lakohi joven sira sai vítima iha ema-nia rain. Foin lalais akontese iha Portugal, iha joven lubuk ida maka hasoru problema ho sira-nia dokumentu. Buat sira ne’e bele implika ba mentalidade joven no sira bele hanoin badak halo fali buat seluk ne’ebé ita hotu la espera,” Ekonomista IOB hateten ba Agência Tatoli, iha ninia knaar fatin, Praia dos Coqueiros, kuarta ne’e.

Notísia relevante: Bankada KHUNTO-CNRT preokupa joven sira buka servisu iha rai-li’ur

Tanba ne’e, nia husu ba Governu fó atensaun ba grupu partidária ka ajénsia sira ne’ebé organiza joven sira bá serbisu iha rai-li’ur no buka hatene legalidade.

“Daudaun ne’e iha grupu partidária balun ne’ebé la’ós ninia kompeténsia maibé halo ona serbisu Governu hodi fó garantia ba joven ho idade produtivu ba serbisu iha rai-li’ur. Hosi konseitu balun ne’ebé Governu presiza fó atensaun maka’as maka iha ona mistura polítika partidária mak komesa sai ona autór hodi organiza joven sira. Ida-ne’e sei sai risku ba joven sira. oinsá ho grupu partidária ka ajénsia sira ne’ebé haruka joven sira sai bá serbisu iha rai-li’ur ne’e nia ligasaun no koordenasaun ho ajénsia iha rai-li’ur ne’e garante ka lae,” nia akresenta.

Aliende ne’e, nia hanoin katak Governu presiza halo verifikasaun no investigasaun hodi halo justifikasaun ba organizasaun ka grupu partidária sira ninia validasaun hosi ezisténsia programa ne’ebé maka sira organiza no halo kontaktu ho ajénsia sira iha rai-li’ur hodi buka hatene kona-ba baze jurídiku, konkordánsia no akordu ne’ebé mak trata entre parte rua.

“Ita husu Governu atu fó atensaun maka’as ba asuntu ne’e atu labele hamosu implikasaun ba futuru joven sira nian,” nia fó hanoin.

Ba kestaun ne’e, nia hato’o perspetiva katak hosi kontestu atu kria kampu traballu ne’e kabe ba pilár ekonomia tolu hanesan setór públiku, setór privadu no kooperativa, ne’ebé hosi setór privadu rasik ko’alia kona-ba ema sira ne’ebé iha organizasaun ka instituisaun ne’ebé eziste ho vida buka lukru hosi negósiu.

“Partidu polítiku sira ne’ebé sai autór hodi garante joven sira bá serbisu iha rai li’ur ne’e tama iha kategoria ne’e ka lae. Ida-ne’e mak tenke fó atensaun. Ha’u-nia hatene organizasaun partidu polítiku Estadu no organizasaun polítika ida, sira la’ós organizasaun autór ekonómika ne’ebé mak atu halo negósiu tanba asuntu kampu traballu ne’e tama ona iha negósiu,” nia tenik.

Atuál Xefe Departamentu Ekonomia no Dezenvolvimentu Rekursu Umanu hosi IOB, konsidera joven sira ho idade produtivu, barak tenke husik nasaun hodi buka serbisu iha ema-nia rain ne’e asuntu ida sériu tebes, tanba ne’e Governu tenke toma desizaun no responsabilidade, se lae bele implika ba setór potensiál sira iha rai-laran no sei labele dezenvolve ho di’ak.

“Ha’u haree polítika Governu liuhosi proposta Grande Opsaun Planu 2023 hateten sei investe barak liu ba joven sira iha parte setór agrikultura. Ha’u kontente tanba polítika di’ak tebes, maibé iha sorin seluk ita-nia Governu fó espasu no fatin hodi kria kondisaun ida avontade ba joven ho idade produtivu sira kontinua sai ba ema-nian rain,” nia salienta.

Akademista ne’e argumenta, bainhira polítika Governu ladún organiza ho didi’ak mak sei hamosu implikasaun ba malu, tanba joven sira sai hotu ba rai-li’ur, husik de’it ferik katuas mak hela iha rai-laran, entaun sei la potensializa setór agrikultura.

Enkuantu, haree hosi pontu de vista akadémiku nian, tuir juvião, joven sira ne’ebé ohin loron sai ba buka serbisu iha rai-li’ur ne’e iha pontu negativu ne’ebé Governu tenke tau konsiderasaun tanba nasaun Timor-Leste ne’e iha joven nia liman.

Jornalista  : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here