Diretiva eskola iha Baucau partisipa iha enkontru regulár ne'ebé hala’o iha Edukasaun Baucau, kuarta (22/06). Imajen Tatoli/Natalino Belo.

BAUCAU, 22 juñu 2022 (TATOLI) – Servisu Munisipál Edukasaun Baucau realiza enkontru regulár hodi evalua inklui fó orientasaun serbisu ba dirijente ensinu eskolár hotu iha munisípiu refere.

Diretór Servisu Munisipál Edukasaun Baucau, Augosto Ornai Ximenes, hateten, enkontru regulár ne’e sempre realiza kada trimestrál hodi informa ba malu serbisu sira-ne’ebé hala’o ligada ho prosesu aprendizajen edukasaun iha Baucau.

Durante enkontru, diretiva eskola sira hato’o lamentasaun mandatu kargu diretór, adjuntu, gabinte apoia tékniku  ensinu sekundária no vokasionál hamutuk na’in-60 no koordenadór ensinu báziku hamutuk na’in-80 resin ne’ebé durante ne’e sempre hetan estensaun sein justifikasaun hosi parte Ministeriu Edukasaun, Juventude no Desportu (MEJD) durante tinan-sanulu resin.

“Ha’u hatene sira baruk ona ho estensaun maibé prosesu diretiva foun ita prosesa hamutuk ho autoridade munisípiu no ministeiru atu hetan despaxu foun, maske sei termina iha loron-30 juñu,” Diretór Servisu Munisipál Edukasaun Baucau, Augostu Ornai Ximenes, hateten iha Baucau, kuarta ne’e.

Augosto Ornai esplika, lákuna hosi problema refere iha dekretu lei númeru 7/2010 kona-ba establesementu integradu ensinu báziku no dekretu lei númeru 33/2010 kona-ba estabelesimentu integradu ensinu sekundária ne’ebé taka dalan ba diretiva sira atu asesu sira-nia progresaun nu’udar rejime karreira dosente tanba bazea ba númeru alunu hodi fó abonu ba diretiva eskola sira ligada ho saláriu báziku no abonu xefia.

Preokupasaun seluk kona-ba rekursu profesór ne’ebé menus iha ensinu eskolár hotu tanba profesór hamutuk 120-resin hahú iha faze idade reforma tanba seidauk iha lei reforma obrigatóriu, maibé seidauk iha rekrutamentu foun hodi subtitui númeru profesór ne’ebé hahú menus iha Baucau.

Alende ne’e, progresu implementasaun Programa Konstrusaun Rehabilitasaun Ekolár (PKRE) ne’ebé daudaun ne’e atinje ona pursentu 25% maibé orsamentu ba konstrusaun  ba faze segundu seidauk transfere ba konta bankária.

Ikus liu mak kona-ba merenda eskolár iha faze dahuluk loron-35 hasoru difikuldade iha fasilidade hanesan dapur no ekipamentu te’in.

Servisu Edukasaun Baucau liuhosi enkontru refere fó orientasaun serbisu atu diretiva eskola hotu tenke submete ona relatóriu orsamentu merenda eskolár no projeitu PKRE nune’e bele hahú fali faze daruak ne’ebé tuir planu sei implementa iha fulan-jullu.

Alende ne’e, husu atu koopera ho parseiru dezenvolvementu hosi WFP ne’ebé sei foti dadus hodi implementa projetu konstrusaun dapur ba eskola 150 no prepara dadus iddentidade kandidatu estudante finalista sira hodi hasoru ezame nasionál.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here