Asesór Administradór Munisípiu Covalima entrega osan ba grupu sira-ne’ebè hetan apoiu orsamentu hosi transferénsia públiku hosi SEJD ba grupu juventude 26. Imajen Tatoli/Celestina Teles.

COVALIMA, 22 juñu 2022 (TATOLI)—Centro Juventude Covalima (CJC) halo monitorizasaun ba grupu hitu (7) iha postu administrativu Suai Vila ne’ebé hetan apoiu fundu hosi SEJD liuhosi programa estimulu empreendedorizmu sosiál juventude, tanba iha postu sira seluk unidade servisu postu halo ona monitorizasaun.

“Centro Juventude Covalima halo monitorizasaun grupu juventude suku sira iha postu administrativu Suai de’it, tanba foin lalais SEJD la rekruta unidade servisu postu administrativu  Suai. Tanba, postu administrativu neen seluk ne’e ami iha ekipa unidade servisu postu halo monotirizasaun progresu servisu ba grupu sira. Ami halo monitorizasaun ba grupu ne’ebé estabelese iha postu administrativu Suai,” Diretór Ezekutivu Centro Juventude Covalima (CJC), Calistro Gusmão Leite, informa ba Agência Tatoli, iha nia knar fatin, aldeia Lokeu, kuarta ne’e.

Bazea ba rezultadu monitorizasaun hosi CJC hatudu, grupu jufentude sira-nia atividade balun la la’o iha situasaun pandemia COVID-19, maibé grupu hirak ne’e hahú hala’o ona sira-nia atividade hodi haki’ak ikan, manu no kuda modo.

Sekretáriu Estadu Juventude no Desportu (SEJD) apoiu fundu ba joven sira liuhosi Programa Estimulu Empreendedorismu Sosiál Juventude Suku iha tinan fiskal 2021 ne’ebé CJC estabelese grupu 26 no hosi grupu ne’e CJC halo de’it monitorizasaun ba grupu hitu (7) ne’ebé  estabelese iha postu Suai Vila.

Centro Juventude Covalima estabelese grupu juventude iha postu administrativu Suai Vila mak iha suku Beco hanesan grupu Estrela ba Futuru ne’ebé foku ba área hortikultura hodi kuda modo, grupo Nakukun ba Naroman foku ba área pekuaria hodi hakiak manu.

Iha suku Debos estabelese grupo Lalenok ba Juventude” ne’eb’e foku ba área pekuaria hodi hakiak manu. Iha suku Labarai harii grupu Juventude Buka Niris ne’ebé foku ba área pekuária hodi hakiak manu no grupu Muda Sistema Agrikultura Sai Modernu hodi kuda modo.

Iha suku Suai Loro ne’e Centro Juventude Covalima (CJC) estabelese grupu sira hanesan grupu Feto Oan Ki’ak haree iha área hortikultura hodi kuda modo, grupu Tali Morin foku ba área pekuaria hodi hakiak ikan.

Bazea ba rezultadu monitorizasaun hosi CJC ba grupu hirak ne’e, grupu balun hatudu ona nia rezultadu hodi koilleta modo, ikan no CJC mós fasilita grupu hodi asesu ba merkadu.

Antes ne’e, iha loron 14 fulan-juñu tinan ne’e, koordenadór programa estimula empreendedorizmu sosiál ba juventude suku, Gabinete SEJD Manuel Monteiro fó sai katak Sekretáriu Estadu Juventude no Desportu (SEJD) liuhosi programa estímula empreendedorizmu sosiál ba juventude, konsege apoia fundu ba grupu joven kreativu na’in-408 iha postu administrativu 55 no suku 267 iha territóriu laran.

Daudadun ne’e, totál grupu benefisiáriu mak iha Aileu grupu hamutuk 45, Ainaro grupu 32, Bobonaro grupu 40, sentru juventude Becora-Dili iha grupu 27, Comoro iha grupu 23, Covalima iha grupu 26, Ermera iha grupu 52, Lautém iha grupu 44, Liquiça iha grupu 32, Manatuto iha grupu 34, Manufahi iha grupu 27, RAEOA iha grupu 22, Viqueque iha grupu 33.

Jornalista : Celestina Teles

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here