Prezidente Interinu Konfederasaun Desportu Timor-Leste (CDTL, siglá portugés), Inocencio Araújo da Silva. Imajen Tatoli/Egas Cristóvão.

DILI, 21 juñu 2022 (TATOLI)—Prezidente Interinu Konfederasaun Desportu Timor-Leste (CDTL, siglá portugés), Inocencio Araújo da Silva, husu apoiu Prezidente Repúblika (PR), José Ramos Horta, atu fó apoiu ba dezenvolvimentu desportu iha Timor-Leste.

“Apoiu ne’ebé ita husu ba Prezidente Repúblika oinsá bele nafatin dezenvolve desportu hanesan primeiru mandatu atividade balun la’o ona, depois buka mós apoiu balun hosi parte balun ne’ebé bele sai patrosinadór ba iha atividade desportu iha Timor-Leste,” Prezidente Interinu ne’e hateten ba jornalista sira hafoin hala’o enkontru ho Xefe Estadu iha Palásiu Prezidensiál Nicolau Lobato, Bairru Pite, kuarta ne’e.

Durante sorumutu, parte CDTL hato’o papél CDTL ba Xefe Estadu atu bele akompaña prosesu tomak ne’ebé la’o hela iha rai-laran hamutuk ho federasaun desportiva hamutuk 35 afilia ba CDTL. Papél CDTL mak atu haree ba dezenvolvimentu federasaun desportiva sira-ne’ebé afiliadu.

“Hosi ida-ne’e ita-nia ekipa halo hela diagnóstika ida ba iha funsionamentu administrasaun operasionál iha federasaun desportiva 35 ne’ebé afilia hela,” nia dehan.

Ekipa CDTL iha departamentu sira-ne’e halo hela diagnóstika hodi haree funsionamentu organizasaun desportu sira ne’ebé eziste iha Timor-Leste.

“Agora problema sede ba iha federasaun desportiva sira, ita hotu hatene iha regra, ita atu ba rejistu iha Ministériu Justisa ida mak ita iha mapeamentu ba iha sede. Se nia rejistu ona iha ne’eba, entaun nia mapeamentu ba Sede ne’e iha ona. Agora laiha tanba ne’e mak CDTL forma hela ekipa ida agora servisu hela halo diagnóstika ba iha federasaun sira-ne’ebé afiliadu ba federasaun internasionál,” nia hateten.

Maibé, to’o agora kondisaun seidauk iha no mós sei haree ba aspetu sira seluk ne’ebé dezenvolve iha sira nia organizasaun federasaun rasik, sira iha atleta ka lae, treinadór ne’ebé kualifikadu ka lae.

“La’ós fatin de’it maibé rekursu ne’ebé federasaun iha ita halo hotu diagnóstika atu hetan ida ne’ebé prióridade rekomenda ba Governu hodi apoiu,” nia hateten.

Durante enkontru, Xefe Estadu hateten nia parte nafatin kolabora ho federasaun desportiva Timor-Leste, ho entidade Governu atu dezenvolve desportiva Timor-Leste ba oin.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here