Funsionáriu kazuál hirak-ne'e mak administrasaun munisipiu Bobonaro hapara sira-nia serbisu. Imajen Tatoli/Sérgio da Cruz.

BOBONARO, 22 juñu 2022 (TATOLI) – Administrasaun Munisipál Bobonaro lideradu Ernesto de Oliveira Barreto, hakotu kontratu ba funsionáriu na’in-sia iha munisípiiu refere.

Funsionáriu kazuál na’in-sia ne’e komposta hosi Pesoál Limpeza Esgotu (PLE) hosi Diresaun Servisu Sanemanetu na’in-neen no Diresaun Servisu Munisipál Água, Sanemanetu no Ambiente (SMASA) na’in-tolu.

Funsionáriu kazuál limpeza ezgotu, José dos Santos, sente triste no lamenta tanba simu karta termina kontratu serbisu hosi sira-nia superiór bainhira hala’o hela limpeza jerál iha kaiptál Maliana.

Funsionáriu kazuál limpeza ezgotu, José dos Santos. Imajen Tatoli/Sérgio da Cruz.

“Ami sente triste tanba derrepente de’it horisehik dadeer de’it ami-nia diretór entrega karta ne’e iha dalan-ninin la ho justifikasaun, iha momentu ami dasa hela fo’er iha estrada laran,” José dos Santos informa ba Agência Tatoli, iha salaun administrasaun munisípiu Bobonaro, kuarta ne’e.

Nune’e mós funsionáriu kazuál Afonso Henrique, konsidera karta ne’e nu’udar símbolu agradesimentu, maibé atitude Diretór Servisu Munisipál Saneamentu ne’e hanesan parte ida la valoriza kontribuisaun ne’ebé presta durante ne’e.

Funsionariu kazuál pesoal limpeza ezgostu, Afonso Henrique. Imajen Tatoli/Sérgio da Cruz.

“Ami ne’e la’ós timor-oan ka ne’e mak fo de’it karta ba ami iha estrada laran ne’e, nusá la bolu ami didi’ak ba kantor mak fó, horisehik ne’e ema ida tensaun maka’as ne’e bele mate liu kedas, tanba ami serbisu namanas hela, ne’e mak fó karta ne’e mai, ami lee primeiru agradesimentu depois iha kraik fali hakarek ami sei para serbisu iha fulan oin,” nia lamenta.

Afonso Henrique husu Prezidente Autoridade Munisípiu Bobonaro, Ernesto de Oliveira Barreto atu esklarese razaun hapara sira-nia serbisu, tanba durante ne’e sempre halo serbisu tuir oras no regra ne’ebé estabelese ona.

Nia haktuir, pesoál na’in-sia ne’e hahú serbisu loron 01 jullu tinan 2018 liubá, no iha momentu ne’ebá selesionadu pasa iha vaga ne’ebé administrasaun Bobonaro anunsia.

“Sé prezidente la esplika razaun hapara ami-nia serbisu, entaun sira na’in-neen ne’ebé tama hamutuk ho ami ne’e mós para lai serbisu, tanba ami la hatene ami-nia sala, derrepente hapara de’it mak ami nain-neen, sira seluk lae fali. Sé hapara ka hasai entaun ami na’in-12 ne’e para hotu kedas,” nia husu.

Karta hapara kontratu nee aprova hosi Prezidente Autoridade Munisípiu Bobonaro, Ernesto de Oliveira Barreto, iha loron 13 fulan-juñu ho konteúdu hato’o agardesimentu ba funsionáriu kazuál na’in-sia hosi Diresaun Servisu Munisipal Saneamentu na’in-neen no na’in-tolu hosi Diresaun Servisu Munisipál Água, Sanemanetu no Ambiente (SMASA) ne’ebé sei termina kontratu serbisu iha loron 30 fulan-juñu 2022 no sei la estende tán.

Ne’e duni hahú hosi loron 01 jullu 2022, Autoridade Munisipál Bobonaro legamente sei laiha relasaun serbisu ho funsionáriu na’in-sia ne’e.

“Hosi data refere ba oin depende ba polítika governu ne’e nian, hodi tetu tuir nesesidade autoridade munisípiu nian,” refere iha karta ne’e.

Funsionáriu kazuál na’in-sia ne’e mak hanesan; Inácia M Ferreira, Jesuina Sarmento da Costa, Ricardina Pinto Gomes, José dos Santos, Luis de Jesus, Mateus de Jesus, Olga Silveira Afonso, Aniceta de Fátima no Afonso Henrique.

Hatán ba kestaun ne’e, Prezidente Autoridade Munisípiu Bobonaro, Ernesto de Oliveira Barreto, justifika razaun hapara funsionariu hirak-ne’e tanba kontratu mak termina no laiha pontualidade iha oras serbisu.

Prezidente Autoridade Munisipiu Bobonaro, Ernesto de Oliveira Barreto. Imajen Tatoli/Sérgio da Cruz.

“Ha’u hasai despaixu bazea ba avaliasaun hosi sira-nia diretór no xefe departamentu, tanba avaliasaun serbisu loron-loron ne’e mak la efikaz, loron ida mai, loron ida la mai, depois oras tama mak ne’ebé, sai mak ne’ebé, konforme sira-nia hakarak, depois balu hanesan funsionáriu mai ho kalsa levis ko’a ko’a, kamiza fulun-fulun, ne’e labele, entaun hakarak ka lakohi labele prolonga tán ona sira-nia kontratu,” Prezidente Autoridade Bobonaro ne’e argumenta.

Tuir observasaun Agência Tatoli katak, ohin iha tuku 08:00 dadeersan funsionáriu kazuál hirak- ne’e tenta hasoru malu ho Prezidente Autoridade Munisípiu Bobonaro hosi husu esklaresimentu razaun hapara serbisu, maibé la konsege tanba autoridade ne’e okupadu ho serbisu seluk, maibé oras ne’e peoál na’in-sia nafatin hein to’o hetan solusaun.

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here