DILI, 21 juñu 2022 (TATOLI)—Autoridade Nasionál Expo Dubai Timor-Leste (ANED-TL) rekomenda ba Governu atu estabelese misaun diplomátiku ho United Arabe Emirates (UAE) hodi tau-matan ba mobilidade laborál profisionál timor-oan sira atu ba serbisu iha Dubai.
“ANEP ninia rekomendasaun dahuluk ba Governu maka sujere estabelese misaun diplomátika, Governu bele haree kestaun ne’e tanba mobilidade laborál profisionál sira ba serbisu iha Dubai, Qatar. Ita (Governu) presiza proteje sira nune’e ita bele follow up wishlist biliaun $1,7 ne’e,” Koordenadór Jerál Expo Dubai, Manuel Vong, hato’o rekomendasaun iha ámbitu aprezentasaun relatóriu Expo Dubai iha salaun nobre Ministériu Negósiu Estranjeiru no Kooperasaun (MNEK), tersa ne’e.
Notísia relevante: Incanto Group asina akordu traballadór ho ajénsia Jobs Global
Eis Governante ne’e konsidera kestaun ne’e hanesan oportunidade di’ak ba Governu Timor-Leste.
“Sujere ba Governu atu konvida liurai UAE mai vizita Timor-Leste ho nune’e ofisializa misaun diplomátika entre país atu ita bele konkretiza duni diplomasia ekonomia tanba ita hakarak atu iha koneksaun entre parte sira,” nia akresenta.
Hatán ba rekomendasaun ne’e, Vise Ministériu Negósiu Estranjeiru no Kooperasaun, Julião da Silva, hateten bainhira prosesu Expo Dubai la’o hela, Ministra Negósiu Estranjeiru no Kooperasaun hala’o vizita traballu ida ho ninia omologu UAE hodi ko’alia kona-ba kooperasaun bilaterál iha futuru entre país rua.
“Hosi hasoru malu entre ita-nia Ministra ho ninia omólogu atu haree ba futuru atu estabelese serbisu diplomata iha ne’ebá. Provizoriamente ita-nia konsul hosi Libanon mak sei mai haree hela, maibé iha futuru ita hakarak estabelese serbisu diplomátiku ho país ida-ne’e,” governante ne’e subliña.
Jornalista : Antónia Gusmão
Editora : Julia Chatarina
