Ministru Ensinu Superiór Siénsia no Kultura, Longuinhos dos Santos. Imajen Tatoli/Francisco Sony

DILI, 21 juñu 2022 (TATOLI)–Instituisaun Ensinu Superior tolu ne’ebé submete ona proposta kréditu ba programa ensinu superiór kualidade+ hosi Banku Nasionál Komérsiu Timor-Leste (BNCTL, sigla portugés) hetan ona konfirmasaun no iha tempu besik bele hahú ona kréditu.

Ministru Ensinu Superior Siénsia no Kultura (MESSK), Longuinhos dos Santos, hateten, relasiona ho prosesu kréditu ba Instituisaun Ensinu Superior Privadu (IESP), daudaun iha ona universidade hamutuk lima mak submete ona sira-nia proposta no universidade balun maka BNCTL husu ona ministériu atu halo paresér.

“Ita halo ona pareser maibé desizaun tomak iha banku nia liman, maibé ita haree iha universidade ou instituisaun tolu hanesan ne’e mak posibilidade banku atu fó ona kréditu ba sira,” Ministru informa ba Agência Tatoli, iha ninia knaar fatin, Colmera, tersa ne’e.

Notísia relevante: IESP lima hato’o ona proposta asesu kréditu Ensinu Superiór Kualidade+

Nune’e, entidade hirak ne’e posibilidade atu hetan ona kréditu maibé seidauk bele anúnsia tanba seidauk hetan lisensa hosi banku atu anúnsia naran sira tanba konfidensiál.

Iha fatin ketak, Reitór Institute of Bussiness (IOB), Pedro Ximenes, relata sira hetan ona konfirmasaun hoi MESSK katak prosesu kréditu la’o ona no daudaun hein de’it finalizasaun kontratu hosi BNCTL rasik.

“Kona-ba universidade hira maka atu hetan kréditu ne’e ministériu mak hatene. Ita simu de’it informasaun hosi ministériu dehan buat hotu loos ona hein de’it banku atu prepara kontratu hodi bolu instituisaun sira mai selebra,” nia tenik.

Jornalista : Tomé Amado   

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here