Peskizadór agrikultura sira aprezenta rezultadu peskiza ba autoridade munisipál ni agrkultór hosi zona Leste iha Vila Nova, Baucau, tersa (21/06). Imajen Tatoli/Natalino Belo.

BAUCAU, 21 juñu 2022 (TATOLI) – Investigadór iha área agrikultura hamutuk na’in-11 aprezenta rezultadu preskiza ne’ebé hala’o iha zona leste komposta hosi munisípiu Baucau, Viqueque no Manatuto.

Diresaun Nasionál Peskiza no Estatístika (DNPE) serbisu hamutuk ho parseiru dezenvolvimentu Agricultutre Inovation Community (AI-COM) besik tinan haat (4) halo peskiza ho inovasaun foun nune’e bele hasa’e produsaun ai-horis oinoin.

Tekonolojia foun ne’ebé introdús oinsá uza materiál lokál sira hanesan hare-latun kombina ho adubu orgánika (karau-tén no adubu sira seluk) inklui mós adubu anorgánika hanesan urea, TSP, KCL hodi deskobre doze ka nível materiál inklui kombinasaun ne’ebé própriu hodi hasa’e produtividade.

Diretór Nasionál Peskiza no Estatístika, Deolindo de Oliveira. Imajen Tatoli/Natalino Belo.

Diretór Nasionál Peskiza no Estatístika, Deolindo de Oliveira, esplika, aprezentasaun ne’ebé hato’o hosi peskizadór sira iha zona leste ne’e ho durasaun to’o tinan-lima no bainhira laiha ona efeitu ba ai-horis sira sei aprezenta rezultadu atu rekomenda ba ministériu.

“Ita rekomenda ba governu buat-ne’ebé di’ak ona, maibé sei kontinua peskiza, koko ba ai-horis hanesan fore-rai, fehuk no seluk tán,” Diretór DNPE hateten iha Vila Nova, tersa ne’e.

Durante peskiza, identifika iha área ka rai balun masin entaun presiza subtitui ka koko ho hare-latun hanesan sunu sai anar atu fó nutrisaun ba rai atubele hasa’e rai-nia bokur no sei hasa’e produsaun ba ai-horis sira.

Matéria aprezentasaun komposta hosi efeitu materiál biochar ba kresimentu no produsaun tipu ai-horis iha fatin rua hanesan suku Burumu no Bahú, postu administrativu Baucau vila, munisípiu Baucau.

Matéria ida-ne’e implementa hosi peskizadór Amandio Ximenes ne’ebé fó-sai rezultadu peskiza hatudu katak atu hasa’e produtividade ai-horis petsai, koto-nurak, malgeta no ai-manas lotuk maka presiza aumenta doze hare-latun ho kuantidade tonelada rua kada ektare (2t/ha).

Peskizadór João Bosco aprezenta matéria influénsia doze hare-latun no karau-tén ba kresimentu no produsaun fehuk-midar iha munisípiu Baucau tinan 2021-2022.

Rezultadu peskiza ne’e hatudu katak, bainhira aplika hare-latun mesak de’it produtividade fehuk-midar sa’e ba 16.6 t/ha no karau-tén ketak de’it, produtividae 16.8 t/ha. Maibé bainhira kombinasaun entre hare-latun 10 t/ha ho 10 t/ha karau-tén bele hasa’e produtividade 30 t/ha.

Peskizadór Luis Fernandes, aprezenta matéria hare-latun +N+P ba kresimentu no produsaun tipu kobi funan iha suku Triloka no Darsula, hare-latun 4 t/ha kombina ho adubu anorgánika +N 20 kg/ha P 10 kg /ha bele hasa’e produtividade 42.2 t/ha.

Peskizadora Julieta Lídia aprezenta matéria kombinasaun materiál hare-latun puru ho hare-latun mais kresimentu no produsaun fehuk-midar, hatudu katak bainhira aplika hare-latun (Biochar) 4 t/ha aumenta tán N 80 kg/ha no P 40 kg/ha bele hasa’e produtividade ai-horis zukini 19.48 t/ha no ai-horis baria 15.89 t/ha.

Peskizadór Inácio Sávio Pereira, aprezenta matéria hare-kulit sunu (biochar) no doze adubu karau-tén ba produsaun ai-horis Tomate, hatudu katak fatór doze hare-latun iha influénsia signifikativu ba produtividade (t/ha) ho rezultadu aas-liu iha doze hare-latun 10 t/ha ho valór 7.97 t/ha, no produtividade (t/ha) ho rezultadu menus liu iha kontrolu ho valór 4.88 t/ha.

Fatór doze adubu orgánika karau-tén iha influénsia signifikativu ba produtividade (t/ha) ho rezultadu aas-liu iha doze adubu karau-tén 15 t/ha ho valor 7.99 t/ha, no produtividade (t/ha) ho rezultadu menus liu iha kontrolu ho valór 4.39 t/ha.

Peskizadór Marcos Correia Vidál, aprezenta matéria sistema fore-mungu lakolen iha natar akadiru-oan Betano no Wenatolok, hatudu katak bainhira rega duut ho erbisida la fila-rai depois kari fore-mungu de’it hamenus loron serbisu 47 to’o kolleta.

Notísia relevante: http://www.tatoli.tl/2018/04/03/al-com-map-no-untl-halo-peskiza-inovasaun-agrikultura-ba-komunidade/

Jornalista    : Natalino Belo

Editór           : Evaristo Saores Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here