Ministru Planu no Ordenamentu ho Autoridade RAEOA diskute estudu prelimináriu kona-bá jestaun lixu sólidu. Imajen mídia ZEEMS.

OÉ-CUSSE, 21 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) no Ministériu Planu Ordenamentu (MPO), tersa ne’e diskute estudu prelimináriu kona-bá jestaun lixu sólidu iha rejiaun ne’e.

Diretór Nasionál Ordenamentu, Klassius Klei Ximenes, informa, sorumutu ho Prezidente Autoridade RAEOA, diskute atividade lixu sólidu iha Oé-Cusse nian, tanba atividade ne’e hetan kooperasaun entre Governu Timor-Leste ho banku investimentu Uniaun Europeia ne’ebé estabelese ona akordu iha 2019.

Nune’e atividade ne’e hahú ezekuta ona 2021, ne’ebé foka liu ba setór tolu, iha água no saneamentu iha Ministériu Obra Públika (MOP) nia okos.

Nune’e mós jestaun lixu sólidu iha Ministériu Administrasaun Estatál (MAE) no agro-floresta iha Ministériu Agrikultura no Peska (MAP), jestaun lixu sólidu foka iha ospitál sira, tanba atividade ne’e koordena hosi Ministériu Planu Ordenamentu.

“Entaun ohin ami audiénsia ho Prezidente Autoridade atu halo estudu premilináriu kona-bá produsaun lixu iha Oé-Cusse kada loron, fulan no tinan, atu iha informasaun téknika nune’e bele iha planu ne’ebé adekuadu ba investimentu iha futuru,” nia katak.

Nia informa, atividade ne’e iha etapa estudu pre-viabilidade tanba antes ne’e, planu estudu premilináriu halo tiha ona, no agora mai Oé-Cusse identifika fatin rua ida maka Hospital Referál Oé-Cusse, ida sei kontinua identifika, ba iha rezídu ospitál no rezídu sólidu, nune’e ba iha estudu pre-viavilidade, atu haree téknika viabilidade ne’ebé eziste iha Oé-Cusse.

Nia fundamenta, molok implementa atividade ne’e, primeiru presiza estudu pre-viabilidade depois hakat ba estudu viabilidade kuandu teknikamente mak viavel mak ezekuta planu hirak-ne’e.

“Ha’u hanoin ita bele hahú implementa tanba ne’e sei iha prosesu nia laran, tanba estudu ne’e presiza fulan 32, komesa iha tinan kotuk agora presiza tán tinan ida to’o 2023 mak bele kompleta estudu ne’e, maibé seidauk bele implementa tanba sei haree lai nia estudu téknika viabilidade” nia katak.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan