Diretór Klínika Moris Foun, Dedi Irawan. Imajen Tatoli/ Isaura Lemos

DILI, 21 juñu 2022 (TATOLI)— Diretór Klínika Moris Foun, Dedi Irawan, rekoñese komete irregularidade iha prosesu importasaun ai-moruk tanba la tuir lista tipu ai-moruk ne’ebé rejistu iha Diresaun Nasionál Farmásia no Medikamentu,Ministériu Saúde.

“Ha’u prontu atu asume responsabilidade kona-ba aktu importasaun ai-moruk ne’e.  Tanba ha’u mak sala. Nune’e ha’u hein de’it sira (Ministériu Públiku) bolu ha’u.  Ha’u prontu ba hataan no simu sansaun tuir lei ne’ebé vigora iha Timor-Leste,” Diretór Klínika ne’e hateten ba Agência TATOLI iha kna’ar fatin Fármasia Colmera, kuarta ne’e.

Tuir kontratu ne’ebé klínika Moris Foun halo ho Ministériu Saúde liuhosi Servisu Autónomu Medikamentu no Ekipamentu Saúde (SAMES) katak, tipu ai-moruk lima mak hatama hamutuk ho SAMES nian. 

Ai-moruk  tipu lima ne’ebé hatama hanesan, paracetamol, Amoxicillin+ and Clavulanate potassium iha doze 250mg, Aluminium hydroxide Al (OH)3, Simethicone Mefenamic Acid+, Dicyclomine HCL no Azithromycin.

Maibé, ai-moruk sira ne’ebé kompañia importadór ne’e hatama mai SAMES, inklui mós ai-moruk sira seluk tán, ne’ebé mak ho kuantidade tipu hamutuk 12 mak, Metronidazole 500 mg tablet, Griseofulvin 500mg tablet, Hyoscine butylbromide mg tablet, Finasteride 5mg tablet, Amoxiclav 625mg tablet, Ambroxol Sirup 15 mg/5 ml no 60 ml, plastic 16 IV cannula, IV cannula18g, IV cannula 20g, IV cannula 22g, IV cannula 24g no umbilical cord Clamping.

“Fornesedór sira iha Índia mak halo fali importasaun ho tipu ai-moruk 12 ne’ebé ami seidauk rejistu iha Ministériu Saúde. Ida ne’e la’ós ha’u mak hakarak hatama, maibé fallansu ne’ebé mak fornesedór sira halo hodi hatama mai ona, nune’e ha’u prontu atu responsabiliza,” nia afirma.

Responsavél ne’e hatutan, “Aktu ne’e liu ona, maibé dahuluk, ha’u só bele husu deskulpa ba sidadaun Timor-Leste hotu, daruak, ha’u tenke responsabiliza aktu ne’e no datoluk,  ha’u promote sei la halo tan iha futuru.”

Polísia Nasionál Servisu Investigasaun Kriminál (PNSIK) halo apreensaun no konklui ona investigasaun no submete ona auto notísia ba Ministériu Públiku atu prosesa tuir lei ne’ebé vigora iha Timor-Leste.

Notísia relevante:  PNTL submete ona kazu importasaun aimoruk hosi Moris Foun ba MP

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here