Koordenadór Jerál Expo Dubai, Manuel Vong. Imajen Tatoli/António Daciparu

DILI, 21 juñu 2022 (TATOLI)—Autoridade Nasionál Expo Dubai Timor-Leste (ANED-TL) aprezenta relatóriu Expo Dubai 2021, tersa ne’e, ba membru Governu no entidade relevante sira, ne’ebé hatudu iha investidór balun iha interese investe iha Timor-Leste.

“Iha Expo Dubai liuhosi promosaun produtu no setór oioin sira ne’ebé ekipa sira halo, ikus mai iha investidór hamutuk 43 mak hakarak investe iha Timor-Leste,” Koordenadór Jerál ANED-TL, Manuel Vong, relata durante aprezentasaun, iha salaun Nobre, Ministériu Negósiu Estranjeiru no Kooperasaun (MNEK), Praia dos Coqueiros, tersa ne’e.

Notísia relevante: Governu apresia timor-oan serbisu iha rai-li’ur tanba ajuda ekonomia família

Nune’e, Manuel Vong husu ba setór privadu sira atu prepara-an no aproveita inisiativa di’ak ne’e no Autoridade Nasionál prontu atu fasilita.

“Ami prontu apoia setór privadu oinsá atu kontaktu ho investidór sira hodi mai investe iha ita-nia rain, ne’e loke ba setór privadu sira, tanba ne’e wishlist ne’ebé hakarak halo investimentu iha Timór, karik interese bele konaktu ami prontu fasilita, ita hakarak Timor-Leste sai duni meiu ida atu dezenvolve rai ida-ne’e sai hosi kiak no kria postu serbisu ba joven sira,” nia otimista.

Eis Governante ne’e dehan, hosi relatóriu Expo Dubai ne’e sujere ba Governu no setór privadu nasionál bele aselera prosesu implementasaun Air Service Agreement (ASA) Timor-Leste no United Arabe Emirates (UAE) nu’udar baze ba dezenvolvimentu konetividade indústria aérea.

Ministru Turizmu Komérsiu no Indústria, José Lucas do Carmo da Silva.,Imajen Tatoli/António Daciparu

Iha biban hanesan, Ministru Turizmu, Komérsiu no Indústria, José Lucas do Carmo da Silva, konsidera partisipasaun Timor-Leste iha Expo Dubai nu’udar meiu ida atu halo promosaun ba potensialidade tomak no oportunidade ba investimentu.

“Liuhosi Expo Dubai ne’e nu’udar oportunidade di’ak ba setór privadu Timor-Leste bele halo koneksaun ho investidór internasionál,” Ministru tenik.

Enkuantu, grand totál wishList investment hosi investidór 43 ho totál orsamentu $1.784.400.000, hosi setór oioin, hanesan turizmu no ospitalidade millaun $775, setór agrikultura millaun $495, aviasaun millaun $228, enerjia no minerál millaun $250 no traballadór profisionál millaun $36.

Nota hosi investidór sira mai Timor-Leste maka líder visioner, estabilidade polítika no seguransa, estabilidade governativa, seguransa judisiál ba asset no investimentu, planu ordenamentu territóriu ba utilizasaun espasu no rai, birokratizasaun no duplikasaun kompeténsia institusionál publiku, armonizasaun lei ba investimentu no negósiu entre setor, lei bankária no mobilidade fundu investimentu, boa governasaun no dezenvolvimentu sustentável.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here