Escola Santa Madalena Canossa, iha Has-laran. Imajen/Espesiál

DILI, 21 juñu 2022 (TATOLI)–Eskola Ensinu Sekundáriu Jerál Katólika, Santa Madalena Canossa iha Has-laran hasai estudante na’in-neen hosi eskola tanba abandona sala aula.

“Foin oras balun nia laran ita hapara estudante feto haat no mane rua hosi eskola tanba durante ne’e sira mai eskola, fatin maka iha merkadu Manleu laran,” Vise-Diretór eskola, Tito Soares Pinto, informa iha ninia knaar fatin, tersa ne’e.

Antes ne’e, eskola simu informasaun hosi komunidade hosi merkadu laran katak durante ne’e iha estudante Canossa maka sempre hela de’it iha merkadu laran, tanba ne’e eskola husu ba profesór sira atu ba buka tuir hodi lori fila mai eskola, maibé bainhira profesór sira hetan no bolu haruka fila ba eskola, estudante sira ne’e halai lakon.

“Ita ba buka sira to’o iha merkadu laran no ita konsege haree hetan estudante sira, balun komesa fuma ona maibé ita bolu sira atu fila mai eskola, maibé hafoin sira haree profesór, sira halai liután la hatene ba ne’ebé. Tanba ne’e desizaun tenke hapara sira hosi eskola Canossa ne’e,” nia haktuir.

Notísia relevante: Eskola Santa Madalena de Canossa Dili lansa programa ‘Eskola Matak’

Tuir Vise-Diretór, desizaun ne’e bazeia ba regulamentu no regra eskola ho papel atu kontrola no eduka estudante sira atu hatene ninia direitu no dever.

“Ita-nia regra estudante ne’ebé maka foti desizaun hakarak eskola iha Canossa tenke obedese ba regra ne’ebé eskola deside ona,” nia afirma.

Maski nune’e, eskola hasai ona karta transferénsia ba estudante atu sira atubele ba kontinua fali iha eskola seluk.

“Kritériu eskola katólika nia rigorozu liu, ba estudante ne’ebé mak mai tarde ka la halo limpeza iha sábadu, sansaun maka tenke selu ho fatuk mean (bata mean), kuandu tarde dala-ida lori fatuk mean rua, kuandu tarde dala-rua lori fatuk mean haat. Ba estudante ne’ebé mak falta to’o dala-tolu eskola sei halo xamada ba inan-aman sira. Tanba kada fulan eskola sempre halo avaliasaun hodi foti dadus partisipasaun estudante sira nian iha aula laran,” nia esplika.

Ba estudante sira ne’ebé maka ladún ativu, eskola sei halo uluk xamada ba ina- aman sira, maibé kuandu estudante sira kontinua halo nafatin, eskola ho inan-aman sira sei halo akordu, kuandu to’o dala-tolu maka akontese nafatin maka eskola sei entrega hikas estudante ne’e ba família hodi buka eskola seluk.

“Parese eskola Canossa la’ós sira-nia fatin atu eskola hodi buka matenek,” nia tenik.

Jornalista  : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here