Jornalista Max Stahl (hatais kalsa badak) ho nia kamera leno hela ba alvu. Imajen/Facebook: Kristy Sword Gusmão.

DILI, 21 juñu 2022 (TATOLI)—Konsellu Imprensa (CI, sigla portugés), tersa ne’e, ofisialmente fó sai ba públiku kona-ba prémiu jornalizmu Max Stahl nian.

Logotipu Conselho de Imprensa (CI). Imajen/Espesiál.

Antes ne’e, CI liuhosi plenária halo ona deliberasaun ho númeru 07/2022, 06 maiu hodi halo prémiu jornalizmu foun ho naran “Prémiu Max Stahl” ho kategória dokumentáriu di’ak liu ba asaun direitu umanu hanesan prémiu sira seluk ne’ebé antes ne’e atribui ona ba jornalista mellór sira.

Notísia Relevante :Jornalista Isaura Lemos sai vensedora prémiu Adelino Gomes 2020

“Prémiu ne’e nu’udar onra no apresiasaun ba jornalista nasaun boot, Max Stahl ne’ebé kontribui ona ba luta libertasaun nasionál Timor-Leste nia ukun rasik aan liuhosi nia misaun lulik jornalizmu iha pasadu,” Prezidente Konsellu Imprensa, Virgílio da Silva Guterres, hateten liuhosi konferénsia imprensa ne’ebé hala’o iha salaun CI, Quintal-Boot Dili.

Jornalista Max Stahl ninia kontribuisaun, povu timor-oan tomak hatene Max Stahl ninia servisu la’ós de’it maka hasai filmazen 12 novembru ba mundu, maibé oinsá nia iha korajen no espíritu aten-brani hodi kontribui ba Timor-Leste ninia independénsia.

Nia esklarese prémiu jornalizmu ne’e tau naran Max Stahl tanba Saudozu Max Stahl hanesan jornalista naran bo’ot ne’ebé kontribui ona ninia obra jornalístika ba luta timor-oan sira durante tinan 24 okupasaun ilegál Indonézia iha Timor-Leste.

Prémiu ne’e, sei anúnsiu ba públiku hahú kuarta ne’e,  ba oin no sai hanesan oportunidade di’ak ida ba jornalista sira hotu iha territóriu timor laran tomak atu aplika.

Desizaun hodi hamosu prémiu foun ne’e bazeia ba lei Komunikasaun Sosial artigu 44 no Projetu Rezolusaun Parlamentu Nasional númeru 83/V (4ª) Institutu Prémiu Max Stahl nu’udar rekoñesimentu ba Saudozu Max Stahl nia luta ba libertasaun nasionál liuhosi ninia obra jornalístiku sira.

Nune’e, jornalista ka meiu komunikasaun sosiál sira bele aplika no sei atribui hamutuk ho prémiu sira seluk iha Balibo iha loron 16, fulan-outubru, lansamentu dahuluk ba loron nasionál ba liberdade imprensa iha Timor-Leste.

Nia esplika kritériu ba prémiu Max Stahl ne’e mak ho video dokumentáriu minimu minutu 30 ne’ebé foka liu ba asuntu sosiál, situasaun atuál no faktu loloos sira ne’ebé sei haforsa liután, aplikasaun ne’e loke ba média audiu no vizuál ne’ebé rejista duni ona iha CI.

Notísia Relevante: The Gajag Boys sai vensedór kompetisaun filme badak DIFF 2021

Jornalista : Arminda Fonseca

Editór       : Agapito dos Santos

PUBLISIDADE HUSI MTCIiklan