Diretór Servisu Agrikultura no Peska Munisípiu Baucau, Moisés Lobato Perreira. Imajen Tatoli/Natalino Belo.

BAUCAU, 21 juñu 2022 (TATOLI) – Servisu Agrikultura no Peska Munisípiu Baucau garante produsaun ai-han bainhira implementasaun lei podér lokál no desentralizasaun administrativa.

Diretór Servisu Agrikultura no Peska Munisípiu Baucau, Moisés Lobato Perreira, hateten, nu’udar tékniku agrikultura kontinua kontribui no prenxe rekizitu tuir kompeténsia ne’ebé atribui hosi autoridade munisipál liuhosi diploma konjunta númeru 48 hosi Ministériu Admistrasaun  Estatál (MAE) no Ministériu Agrikultura no Peska (MAP) bazea ba dekretu-lei númeru 3/2016 nune’e bele aselera implementasaun lei podér lokál no desentralizasaun administrativa.

“Ita iha esperansa tanba área potensiál iha Timor-Leste ida mak Baucau, durante ne’e seidauk iha infraestrutura ne’ebé sufisiente atu agrikultór sira dezenvolve natar no to’os, maibé ema hotu halo to’os no natar Baucau sai sentru produsaun,” Diretór Servisu Munisipál Agrikultura no Peskas Baucau informa ba Agência Tatoli iha Vila Nova, tersa ne’e.

Moisés konsidera setór agrikultura nu’udar xave ba dezenvolvimentu ekonomia nune’e kontinua esforsu liuhosi orsamentu natoon atu hasa’e produsaun inklui servisu hamutuk MAP nune’e ajusta tuir polítika nasionál hodi dezenvolve ekonomia iha munisípiu Baucau.

Nune’e mós kontinua halo kooperasaun serbisu hamutuk ho parseiru dezenvolvimentu sira hodi haree atividade importante iha setór agrikultura, liuliu infraestrutura no dezenvolve ai-han hanesan UNDP ne’ebé finansia atu kontrui irrigasaun haat hanesan Luge iha suku Soba, postu Laga, suku Badumori, Fatulia, postu Venilale no reabilitasaun irrigasaun Bluto, postu Vemasse.

“Ha’u espera kontinua serbisu hamutuk ho parseiru sira atu haree infraestrutura no dezenvolve ai-han ne’ebé importante nune’e bainhira implementasaun podér lokál, ita prepradu ona tanba bele prense rekizitu sira hotu,” Moisés argumenta.

Nu’udar diresaun ne’ebé apoia autoridade munisipál kontinua reforsa infraestrutura iha área poténsia hanesan irrigasaun boot rua Bluto no Larisula, postu Baguia inklui semí-permanente sira hanesan iha postu Venilale, Baucau vila iha suku Samalari, Seiçal, Gariuai, Buruma no Uailili, postu Laga iha suku Samalari, Soba no Tekinomata inklui postu Vemase iha suku Ossouala.

Agrikultór iha Baucau maioria prodús ai-han hanesan foos, batar, fore-rai, lís no tomate ne’ebé tuir dadus, utiliza totál rai ba atividade natar hamutuk ektare rihun 14 no to’os hamutuk ektare rihun 16.

Jornalista   : Natalino Belo

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here