Autoridade RAEOA selebra akordu ho INCT promove peskiza iha área temátika lima. Imajen mídia ZEEMS.

OÉ-CUSSE, 21 juñu 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) no Institutu Nasionál Siénsia Téknolojia (INCT, sigla portugés), tersa ne’e selebra akordu iha área temátika lima.

Área temátika lima ne’e komposta hosi agrikultura, ekonomia, indústria turizmu, infraestrutura, teknolojia no inovasaun inklui meiu ambiente biodiversidade ba mudansa klimátika.

“Selebra akordu ne’e atu promove peskiza iha área lima kona-bá agrikultura, ekonomia, indústria no turizmu, infraestrutura, teknolojia no inovasaun inklui meiu ambiente biodiversidade ba mudansa klimátika, ne’e ita bele halo peskiza hamutuk sai referénsia ba RAEOA, nune’e iha futuru trasa polítika no planu ne’ebé di’ak iha prosesu dezenvolvimentu,” Prezidente Ezekutivu INCT, José Cornelio Guterres, hatete iha Oé-Cusse.

Nia informa, dezenvolvimentu ekonomia iha RAEOA estratéjiku tanba viziñu kedan ho ho Indonézia, kuandu serbisu hamutuk ekonomia tenke livre atu halo movimentasaun.

Iha área turizmu, sei foka liu ba fatin istóriku tanba RAEOA fatin istóriku úniku, dezde uluk, nasaun barak mai Timor tama liuhosi Lifau, no turizmu kulturál, turizmu relijiozu, tanba Igreja Kátolika hahú tama liuhosi odamatan Oé-Cusse, entaun persiza dezenvolve.

Nune’e tuir planu kaléndariu atu implementa akordu ne’e, parte INCT, sei dezeña fali TOR ida, tanba akordu ne’e importante atu nstituisaun ne’e selebra uluk, maibé depois ba tékniku peskiza iha área ne’ebé, sei persiza akordu tékniku ida mak foin halo implementasaun.

Prezidente Autoridade RAEOA, Arsénio Paixão Bano, informa, kooperasaun ne’e importante tanba ne’e sei loke dalan ba servisu hamutuk entre RAEOA ho INCT, loke dalan bele halo peskiza no investigasaun ba asuntu saida mak RAEOA husu.

“Ohin ha’u husu RAEOA fó peskiza kona-bá modelu edukasaun di’ak, atu orienta ba kampu traballu, saida mak RAEOA la presiza halo, tanba ita tinan ne’e atu harii sentru formasaun ba apoiu profesór, mais ha’u hakarak profesór-sira aprende atu foku maka’as ba saida,” nia katak.

Valór orsamentu akordu montante rihun $5 kada projetu, maibé iha futuru sei depende mós kona-bá área estudu, tanba área balu volume boot tanba sei halo mós estudu iha NTT no RAEOA.

Jornalista   : Abílio Elo Nini
Editór         : Evaristo Soares Martins

PUBLISIDADE HUSI MTCIiklan