Atividade konsultasaun públika ba PED 2011-2030 ba sosiedade sivil sira, iha salaun administrasaun munisipál, tersa (21/06). Imajen Tatoli/Vitorino Lopes da Costa

VIQUEQUE, 21 juñu 2022 (TATOLI)—Vise-Prezidente Asosiasaun feto poténsial munisípiu Viqueque, Celeste Sarmento Guteres, husu Sekretaria Estadu Kooperativa (SEKOOP) presiza tau-atensaun ba kooperativa sira iha munisípiu Viqueque hodi garante sustentablidade ekonomia família.

“Ami husu ba SEKoop presiza tau-atensaun ba kooperativa sira iha aldeia no suku iha munisípiu Viqueque hodi grante ba sustentablidade ekonomia família. Tanba ami rona hosi mídia katak kooperativa sira iha nasionál hetan apoiu, maibé ami grupu kiik sira iha munisípiu la hetan,” Vise-Prezidente Asosiasaun feto hateten durante aprezentasaun ajustamentu Planu Estratéjiku Dezenvolvimentu (PED) 2011-2030, iha salaun administrasaun munisipál, tersa ne’e.

Notísia relevante: Sosiedade sivil Viqueque prefere PED 2011-2030 tau perioridade ba dezenvolvimentu urbana

Tuir Celeste Sarmento, iha munisípiu Viqueque grupu sira kria ona kooperativa hamutuk 12 maibé laiha susesu tanba ekipa SEKoop seidauk haree produsaun saida maka durante ne’e grupu kooperativa sira prodús.

“Iha munisípiu Viqueque kooperativa hamutuk 12, ami hala’o kooperativa produsaun, maibé ekipa hosi SEKoop nunka mai vizita ami. Produsaun saida maka daudaun ne’e ami halo iha ami-nia kooperativa iha grupu ida-idak iha munisípiu Viqueque,” nia akresenta.

Iha biban hanesan, Ministru Koordendór Asuntu Ekonómiku (MKAE), Joaquim Amaral, hateten, grupu kooperativa sira nafatin halo koordenasaun no bele haruka karta ba ministériu, tanba iha planu rekuperasaun ekonómiku tau-atensaun boot ba reforsa setór kooperativa sira no iha tinan kotuk Governu aloka orsamentu ba kooperativa.

“Ha’u hein katak estrutura kooperativa bele halo jestaun ba apoiu ne’ebé Estadu transfere, atu fó benifísiu ba membru sira tanba Governu nian politika iha suku hotu iha kooperativa. Agradese ba inisiativa sira ne’ebé kooperativa sira kontinua no ita-boot sira atividade kooperativa. Kooperativa ninia espíritu maka voluntáriu. Tanba ne’e ha’u husu nafatin organiza malu no Estadu ho ninia kbiit sei tau-matan, tanba ne’e  koordena ho SEKoop,” nia hato’o.

Jornalista : Vitorino Lopes da Costa

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here