Xefe Suku Belekasak, Leonito Gusmão. Imajen Tatoli/Celestina Teles.

COVALIMA, 20 juñu 2022 (TATOLI)–Xefe suku Belekasak, postu administrativu Maucatar, munisípiu Covalima, Leonito Gusmão, informa nia parte simu ona saláriu ka insentivu $250 ne’ebé Parlamentu Nasionál aaprova ha OJE 2022.

Notísia Relevante: PN aprova: saláriu xefe suku $140 hasa’e ba $250

“Ami-nia insentivu sa’e iha fulan janeiru no iha fulan tolu kotuk ami simu $140, maibé foin lalais ne’e ami simu kompletu saláriu ka insentivu $250 ne’ebé parlamentu nasionál aprova ona,” Leonito Gusmão hato’o ba Aência Tatoli, iha resintu Administrasaun Munisípiu Covalima, Kampung Baru, segunda ne’e.

Antes ne’e antes ne’e xefe suku ho intensivu kada fulan ida $140 hasa’e ba $250, xefe aldeia ho intensivu kada fulan ida $100 hasa’e ba $150, pesoál apoiu servisu administrasaun suku ho intensivu kada fulan ida $115 hasa’e ba $140, delegadu no delegada ho lia-na’in sira antes ne’e ho intensivu ho $30 hasa’e ba $40 kada fulan.

Ho nune’e, nia parte hato’o agradese ba VIII Governu Konstituisionál ne’ebé kumpre nia promesa hodi hasa’e osan ba ba xefe suku sira-nia salariu ne’e sufisiente uitoan tanba durante kuaze tinan lima simu insentivu $140.

Xefe Suku Matai, João Gusmão, reforsa  hafoin parlamentu nasionál aprova no públika iha jornal repúblika, xefe suku iha territóriu nasionál simu ona insentivu ka saláriu $250 tanba transfere ona ba ida-idak nia konta bankaria.

“Ami simu ona insentivu ka saláriu iha fulan juñu,” nia dehan

Antes ne’e, iha loron 15 fulan juñu, Ministru Administrasaun Estatál (MAE), Miguel Pereira de Carvalho, hateten bainhira membru konsellu suku eleitu iha 2004 hahú ho subsídiu sira ho valór $15, ho alterasaun subsídiu akontese iha 2012 no halo revizaun iha tinan 2014 konsege hasa’e insentivu subsídiu ba xefe suku sira ho $140 no to’o agora halo ona tinan hitu tempu ona presiza hasa’e insentivu ba líder komunitária sira.

Tuir dadus, iha territóriu nasionál ne’e xefe suku sira hamutuk 452 no hosi suku 452 ne’e, xefe aldeia hamutuk 2,233, pesoál apoiu administrasaun suku hamutuk 452, delegadu ka delegada no lia-na’in hamutuk 5,822 ne’e inklui Rejiaun Administrativa Espesial Oé-Cusse Ambeno (RAEOA).

Jornalista : Celestina Teles

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here