Prezidente FFTL, Francisco Jerónimo. Imajen TATOLI/Francisco Sony

DILI, 20 juñu 2022 (TATOLI)– Prezidente Federasaun Futeból Timor-Leste (FFTL), Francisco Martins da Costa Pereira Jerónimo, informa, tempu besik konsultór hosi Federation International Football Association (FIFA) mai halo verifikasaun ba kampu FFTL atubele halo konstrusaun foun.

“Kampu FFTL ne’e, Governu entrega ona mai FFTL, nune’e FIFA tau orsamentu atu halo konstrusaun foun. Tanba ne’e ekipa konsultór FIFA atu mai haree no verifika hodi bele hadi’a kampu FFTL ne’e,” Prezidente FFTL ne’e hateten ba Agência TATOLI iha edifisiu FFTL, foin lalais ne’e.

Kampu FFTL, Primeiru Governu Konstitusionál ne’ebé lideradu hosi Primeiru Ministru, Mari Alkatiri no Prezidente Repúblika Kay Rala Xanana Gusmão atribui ona ba FFTL. Nune’e VIII Governu liuhosi Ministeriu Justisa atribui direitu institusionál ba FFTL no bele sai na’in ona ba kampu no rai ne’e.

Enkuantu, Estádiu Munisipál Dili mak Governu atribui ona ba FFTL, maibé ho kontratu areendamentu kada fulan selu ba estadu, maibé kontratu seidauk iha tanba parte tékniku sei halo levantamentu dadus iha tereñu.

Tanba ne’e, FIFA sei konstrui uluk kampu FFTL, hodi hein kontratu areendamentu ba Estádiu Dili finaliza mak konstrui tan Estádiu Dili sai hanesan kampu ne’ebé tuir padraun internasionál

“Ha’u koalia bebeik ho FIFA, ami liuhosi telefónika sempre ko’alia oinsa aselera prosesu ne’e iha tinan ne’e, atu tinan oin ita bele iha ona kampu ne’ebé iha tuir padraun internasionál,” nia afirma. nia dehan.

Totál orsamentu atu konstroi kampu FFTL seidauk hatene montante, tanba buat hotu FIFA mak kaer to’o ramata mak entrega ba FFTL atu jere no kada fulan-selu ba Governu tuir kontratu.

Notísia relevante: Governu deside atribui Estádiu Munisipál Dili ba FFTL

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here