Prezu sira iha Prizaun Becora. Imajen/Dok.TATOLI

DILI, 20 juñu 2022 (TATOLI)00–Diretora Nasionál Polítika, Jéneru no Inkluzaun, Sekretária Estadu Igualdade no Inkluzaun (SEII), Maria Filomeno Babo Horta, hateten SEII fó formasaun kontrola emosaun hirus ba prizioneiru 35 iha prizaun Becora.

“Ita-nia formasaun kontrola hirus ba prizioneiru ne’e alvu ba ema na’in-35 maibé karik bele liu no menus,” nia hateten ba Agência TATOLI iha Prizaun Becora, Dili, segunda ne’e.

Tuir nia, formsaun ida-ne’e bele dehan hahalok kontrola violentu, formasaun kontrola hirus, no programa ne’e SEII implementa iha 2010 no ofisiálmente halo iha prizaun kada tinan iha prizaun sira iha Timor-Leste.

“Objetivu prinsipál mak oinsá ita hanorin prizioneiru sira atu kontrola sira-nia emosaun hirus ne’e, tanba dala barak emosaun hirus ne’e mak lori sira mai iha prizaun. Tanba ne’e, presiza fó formasaun ba sira atu bele maneja sira-nia emosaun hirus ne’e,” nia dehan.

Diretora ne’e esplika, matéria ne’ebé mak oferese ba sira desigualdade ida kona-ba íntimu no mó oinsá haree ba roda igualdade no ho ida-ne’e mak hamosu igualdade ba sira.

SEII sei fó materia mapeamentu ba futuru katak saida mak sira hakarak atinje depois sai hosi prizaun ne’e, tanba ne’e sira tuir formasaun iha prizaun laran no loron ruma sei re-integra ba sira-nia família.

Iha formasaun loron dahuluk, bainhira ekipa SEII fó formasaun ba prizioneiru sira-ne’e, prizioneiru barak mak tuku hirus (arrepende) no tanis.

Formasaun kontrola emosaun hirus ba prizioneiru sira-ne’e durante loron lima, hahú hosi segunda (20/06) to’o sesta ne’e (20-25/06).

Entretantu liga ho formasaun kontrola emosaun hirus ka violentu ne’e, Diretór Prizaun Becora, João Domingos sujere ba SEII atu fó formasaun kontrola violentu ne’e mós ba sosiedade sira liuhosi aldeia to’o suku.

“Tanba formasaun ida kontrola hahalok violentu ne’e la’ós ba dadur sira de’it oinsá kurativu, maibé ita halo preventiva ida para ema labele halo krime. Agora ema halo tiha krime mak ita fó formasaun, enatun ida-ne’e ita kura de’it para ema labele halo maibé di’ak liu halo formasaun ba komunidade iha aldeia no suku sira,” nia esplika.

Jornalista  : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here