Peskadór hala'o atividade peskas iha tasi ibun Pantai Kampu Alor, kuarta (27/04). Imajen Tatoli/Francisco Sony

BOBONARO, 20 juñu 2022 (TATOLI) – Polítika VIII Governu Konstitusionál lideradu Primeiru Ministru, Taur Matan Ruak, atu halo reajustamentu ba Planu Estratéjiku Dezenvolvimentu (PED) 2011-2030 tanba meta balun la atinje. Espetativa hosi polítika reajustamentu ne’e halo xefe suku sira husu Governu atu konsidera mós setór peska iha Orsamentu Jerál Estadu (OJE) kada tinan. 

Razaun xefe suku sira husu Governu tau atensaun ba setór peska tanba Timor-Leste iha poténsia tasi luan tebes, maibé dezde governasaun dahuluk to’o oras ne’e ladún konsidera iha OJE kada tinan. Razaun seluk ne’ebé xefe suku sira propoin tanba bainhira investimentu ba setór peska ho loloos, bele fó reseita ne’ebé boot ba kofre estadu.

Nune’e iha loron-segunda-ne’e, Ministériu Planu no Ordenamentu (MPO) realiza konsulta públiku iha munisípiu Bobonaro kona-ba atu halo reajustamentu Planu Estratéjiku Dezenvolvimentu (PED) 2011-2030.   

Durante audiénsia públiku ne’e, Xefe suku Aidabaleten, postu administrativu Atabae, munisípiu Bobonaro, Francisco Leite, husu ba Governu liuhosi Ministériu Agrikultura no Peska (MAP) atu konsidera setór peska iha OJE tanba setór refere nu’udar fonte reseita ida ba estadu.

Notísia relevante: Tinan 2018, Timor-Leste lakon ikan tonelada 223

Nia akresenta, MAP tenke kria polítika ida-ne’ebé di’ak atu dezenvolve  no kontrola tasi nune’e bele esplora rikeza iha tasi atubele kontribui reseita ba estadu nune’e labele dependénsia liu ba fundu minarai ne’ebé tempu ruma sei maran.

Xefe suku Aidabaleten, Francisco Leite. Imajen Tatoli/Sérgio da Cruz.

“Ha’u rekomenda ba Governu atu apoiu ekipamentu ba peskadór sira, atu utiliza sasán sira-ne’e kaer ikan, tanba ikan sira-ne’e la presiza ita fó-han, ita-nia joven sira ba rai-li’ur mós serbisu iha Tasi, nusá mak ita lakohi dezenvolve tasi atu hatama taxa ba nasaun,” xefe suku Aidabaleten ne’e propoin liuhosi konsulta públiku ne’e.

Hosi tinan 2018 to’o 2019, tuir informasaun ne’ebé asesu liu hosi satelite katak ró unidade 107 mak tama ilegál no na’ok ikan tonelada 223, ne’ebé karik konverte tau ba osan hamtuk millaun $1,1, no iha 2019 iha ró unidade 63 tama ilegál halo atividadade peska iha Tasi Timor.

Iha fatin hanesan, Xefe suku Ilat-Laun, postu administrativu Bobonaro, Juvinál Pires Amaral, reforsa atu hasa’e ekonomía nasaun governu presiza imveste maka’as iha setór peska tanba durante ne’e prioritiza liu iha setór agrikultura, maibé setór peska ne’e ‘abandona’ hela.

“Orsamentu ba setór agrikultura mak menus liu, tanba ne’e mak realidade estensionista sira barak mak ita rekruta agora abandona hela sa’e motorizada ba-mai, maibé serbisu laiha, entaun tenke aloka orsamentu ba estensionista sira atu halo serbisu iha suku hodi ita bele hasa’e rendimentu agrikultura,” nia rekomenda.

Timor-Leste mak Estadu kosteiru ida iha Sudeste Aziátiku, noroeste husi Austrália no parte lorosa’e hosi Indonézia nia arkipélagu nia rohan.

Ba lorosa’e, norte no oeste, Timor-Leste viziñu marítima ho Indonézia, Estadu arkipélagu ida-ne’ebé boot liu hotu iha mundu.

Hosi parte súl, Timor-Leste viziñu ho Austrália, ne’ebé iha área marítima boot liu iha mundu. Tasi Timor mak fahe Timor-Leste ho Austrália ho distánsia besik 250 millas naútika, hosi pontu ne’ebé besik liu no la dook liu hosi 400 millas naútika. Plataforma kontinentál iha Tasi Timor ne’e la kle’an liuhosi 200 millas naútika. Nia luan hosi rai maran noroeste Austrália nian to’o tasi kle’an no kloot Timor Trough.

Parte hosi plataforma ida-ne’e ema hanaran Bonaparte Basin, basia sedimentár (tahu iha tasi-kidun) no zona ida prospetiva tebes ne’ebé inklui depózitu gaz-kondensadu Sunrise no Troubadour (hamutuk ema hanaran Greater Sunrise).

Notísia relevante: MPO hahú konsulta ho Autoridade Bobonaro kona-ba reajustamentu PED 2011-2030

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here