Prezidente Repúblika, José Ramos Horta no ekopa vizita ba sede g7+ hodi enkontru ho ekipa g7+, segunda (20/06).Imajen Tatoli/Antónia Gusmão

DILI, 20 juñu 2022 (TATOLI)–Prezidente Repúblika (PR), José Ramos Horta, husu ba organizasaun intergovernamentál g7+ ajuda tau-matan ba rekonsiliasaun.

Vise Sekretáriu Jerál g7+, Habib Mayar entrega lembransa ba Prezidente Repúblika, José Ramos Horta, iha sede g7+, segunda (20/06). Imajen Tatoli/Antónia Gusmão

“Husu ba g7+ ajuda ha’u, pesoalmente administrativa nu’udar Prezidente Repúblika, atu tau-matan ba rekonsiliasaun liuliu haree ba oinsá ajuda ita rezolve ita-nia ema sira sei nafatin iha Timur ne’ebá, barak haluha tiha sira ona, maibé ha’u nunka haluha, iha ha’u-nia mandatu dahuluk ha’u tenta rezolve maibé la konsege. Daudaun hakarak rezolve ida-ne’e definitivu tanba barak hakarak fila, la fila tanba sei iha problema justisa internasionál, ne’e maka trava tiha,” Xefe Estadu hateten iha sede g7+, iha Palásiu Governu, segunda ne’e.

Xefe Estadu sente ksolok ho vizita g7+, ne’ebé Timor-Leste mak fundadór, momentu ne’ebá Xanana Gusmão no Eis Ministra Finansa, Emilia Pires mak hahú prosesu ne’e.

“g7+ ne’ebé reprezenta Estadu frazil Ázia no Áfrika, manán kredibilidade nu’udar parseiru diálogu ho rai barak, Uniaun Europeia, país individualmente no sistema Nasaun Unida. Tanba g7+ nu’udar observadór iha Nasaun Unida ho estatutu hanesan organizasaun multilaterál sira seluk, iha influénsia ho rai sira industrializadu, diálogu internasionál kona-ba konflitu, dezenvolvimentu sustentável sempre rona pontu vista g7+,” nia akresenta.

Notísia relevante: Kada tinan, Governu iha kompromisu apoia finaseiru ba g7+

Horta konta, Xanana Gusmão hatudu nia vizaun atu halibur Estadu frazil sira ne’ebé iha esperiénsia komun atu defende ajenda komun ho parseiru internasionál sira.

“Tanba ne’e, ha’u nu’udar Xefe Estadu no enviadu espesiál g7+ sente kontente ho vizita g7+, maski durante tinan hirak nia laran ladún kontribui diretamente maibé kontribui nu’udar timor-oan tanba Timór hola parte iha g7+ no partisipa iha reuniaun barak,” nia tenik.

Iha enkontru ne’e, Vise Sekretáriu Jerál, Habib Mayar, relata, kona-ba progresu serbisu g7+ nian no fahe informasaun kona-ba nasaun membru sira.

“Senti orgullu no onradu ho prezensa Prezidente Repúblika iha sede g7+. Vizita ne’e mós iha momentu ne’ebé importante atu hetan idea no opiniaun hosi Prezidente relasiona ho situasaun krize jeopolítika ne’ebé akontese iha mundu agora. Vizita ne’e mós hanesan oportunidade hodi rona Ramos Horta, iha nia kapasidade hanesan enviada espesiál g7+, fahe hanoin estratéjiku hodi ajuda nasaun membru 97+ sira ne’ebé agora dadauk enfrenta hela konflitu, frajilidade no krize umanitária,” Vise Sekretáriu Jerál dehan.

Enkuantu, tinan tolu liubá, iha enkontru ministeriál g7+ ba dala-lima ne’ebé hala’o iha juñu 2019 iha Lisboa, grupo g7+ koletivamente nomea ona José Ramos Horta nu’udar enviada espesiál.

Enkontru ne’e partisipa hosi entidade relevante hosi Governu no pontu fokál husi nasaun membru liu 97.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here