Country Representative Banku Mundiál iha Timor-Leste, Bernard Harborne. Imajen TATOLI/Egas Cristóvão.

DILI, 20 juñu 2022 (TATOLI)- Prezidente Repúblika (PR), José Ramos Horta, segunda ne’e simu audiénsia ho Country Representative Banku Mundiál iha Timor-Leste, Bernard Harborne, hodi diskute problema má nutrisaun iha Timor-Leste liliu ba labarik sira.

Notísia Relevante: PR husu Governu kombate má nutrisaun-hadi’a kualidade edukasaun ba labarik

“Ami-nia enkontru di’ak tebes iha diskusaun naruk kona-ba prioridade iha Timor-Leste. Ami ko’alia kona-ba kondisaun moris labarik nian iha ne’ebé metade hosi labarik Timor-Leste moris ho kondisaun má nutrisaun. Tanba ida-ne’e mak xave prioridade hosi PR no mós Banku Mundiál nian,” Bernard Harborne hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru Pite.

Nia hateten, Xefe Estadu ho Banku Mundiál mós ko’alia kona-ba hakarak atu labarik hosi tinan tolu (3) ba tinan lima (5) atu 100% asesu ba pre-eskolar.

“Ida-ne’e mós importante tebes hanesan Banku Mundiá nia prioridade. Tanba ne’e mak presiza diskute asuntu hirak ne’e ho Governu,” nia dehan.

Tuir Country Representative Banku Mundiál iha Timor-Leste ne’e, nota katak folin hahán no petróliu no presiza mós iha fulan oin tenki kuidadu hodi suporta família vulneravel sira.

“Ha’u mós ko’alia kona-ba fundu veteranu ne’ebé mak presiza regulamentu hosi Governu atu uza fundu refere ho atividade ne’ebé mak produtivu, ho nune’e atu labele manda de’it fundu,” nia dehan.

Bibán ne’e PR ho Country Representative Banku Mundiál ko’alia kona-ba vizaun ba nasaun ne’e, atu nune’e tinan hirak tuir mai halo Timor-Leste sai sentru finanseiru iha rejiaun ne’e no mós sai sentru ba teknolojia atu oinsá bele hamoris ekonomia.

“Agora daudaun ne’e ami fornese apoiu tékniku ba Governu atu buka dalan oinsá osan hira mak presiza hosi OJE hodi suporta labarik sira-ne’ebé ho má nutrisaun no suporta programa iha área má nutrisaun,” nia hateten.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here