Jerente Mai Sport Zone Gym Timor-Leste (MGSTL), Anastácio da Costa. Imajen/Hortencio Sancnzes

DILI, 20 juñu 2022 (TATOLI)– Empreza Mai Sport Zone Gym Timor-Leste (MGSTL) koopera ho  Federasaun Basketeból Timor-Leste (FBTL) atu realiza torneiu dahuluk basketeból iha fulan jullu ne’e, atu hasa’e kapasidade no esperensia basketebolista iha Timor-Leste. 

“Fulan oin, ami iha inisiativa loke eventu basketeból tanba durante ne’e ami nia fatin ne’e ema liuliu joven-sira ne’ebé iha talent mai halimar basketeból, nune’e ami hanoin ona atu realiza kompetisaun basketeból hodi klube sira bele mai partisipa atubele hasa’e sira nia kapasidade,” Jerente Mai Sport Zone Gym Timor-Leste (MGSTL), Anastácio da Costa, hateten ba Agência TATOL iha edifisiu MGSTL, Hudi-Laran-Dili, segunda ne’e.

MGSTL iha inisiativa realiza torneiu ne’e tanba observa durante ne’e atividade basketeból ladun la’o. 

Imajen/Espesial

“Ami sei la halo mesak atividade ne’e, ami sei involve mós FBTL ho sira nia ekipa mai halo verifikasaun ba ami nia kampu no regulamentu jogu atu aplika iha eventu ne’e. Ami ho FBTL enkontru dala tolu ona ne’ebé deside jogu sei hala’o iha 02 too 26 jullu tinan ne’e,” nia esplika.

Daudaun ne’e, MGSTL hahú hela rejistrasaun ba klube basketeból hotu atu sira bele partisipa iha kompetisaun ne’e.

“Rejistrasaun ami loke ba sé de’it, klube barak liu di’ak liu atu nune’e ita mós bele promove ita nia atleta basketeból iha Timor-Leste, tanba agora liga mós laiha jogu mós laiha mak ami iha inisiativa loke eventu ne’e,” nia esplika

Tuir tarjetu ne’ebé iha ekipa ne’ebé mak sai kampiaun ka primeiru lugar sei hetan prémiu ho osan $1000, segundu lugar $700, terseiru lugar $500 no kuartu lugar $200.

Jogu ne’e sei halao ho jogadór na’in-neen de’it mak iha kampu laran tanba kada ekipa ida ema na’in-tolu de’it mak sei joga ho sistema tolu kontra tolu.

Enkuantu, patrosinadór ba eventu ne’e mai hosi, Nocot Motorcygle, Aqua Fresca, Lin Brother, Golgota Hotel, Golgota Mall no seluk tan.

Jornalista: Hortencio Sanchez

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here