Aimoruk Dexamethasone tablet hosi India.Imajen/Espesial

DILI, 20 juñu 2022 (TATOLI)—Ministra Saúde (MS), Maria Odete Freitas Belo, informa deside ona atu suspende distribuisaun aimoruk dexamethasone no simvastatin ba fasilidade saúde sira iha territóriu nasionál tanba laiha kualidade, hafoin halo teste iha laboratóriu Therapeutic Goods Administration (TGA) Austrália.

“Ami hamutuk ho Diretór Nasionál sira para suspende atu labele distribui aimoruk tipu dexamethasone no simvastatin ne’ebé laiha kualidade ba fasilidade saúde sira,” Ministra Saúde, hateten ba jornalista sira iha Kampu-Alór-Dili, segunda ne’e.

Ministra Saúde, Odete Maria Freitas Belo. Imajen Tatoli/Francisco Sony

Governante ne’e dehan medikamentu ne’ebé laiha kualidade ne’e Servisu Autonómu Medikamentu no Ekipamentu Saúde (SAMES) sosa iha nasaun Índia no konsege distribui ona ba fasilidade saúde iha territóriu nasionál.

Nune’e, Ministra Saúde mós apela ba fasilidade saúde iha territóriu nasionál atu labele fó aimoruk tipu rua ne’e ba pasiente sira.

Atu garante kualidade aimoruk, Governu liuhosi Ministériu Saúde (MS), planu hala’o kooperasaun ho Indonézia no Tailándia atu halo teste ba aimoruk importasaun sira.

“Ita kontinua nafatin halo kooperasaun ho Austrália liuhosi Laboratóriu Therapeutic Goods Administration (TGA), maibé ita mós halo kooperasaun tan ho nasaun viziñu sira hanesan Indonézia no Tailándia atu halo teste ba aimoruk importasaun sira hodi garante nia kualidade,” Ministra afirma.

Governante ne’e informa Ministériu Saúde asina akordu ho TGA hodi halo teste ba kualidade aimoruk sira ne’ebé halo akizasaun hosi estranjeiru.

Iha biban hanesan, Diretór Ezekutivu SAMES, Santana Martins, hateten aimoruk tipu rua  ne’ebé mak laiha kualidade Ministériu Saúde husu atu suspende halo distribuisaun ba fasilidade saúde sira.

“Aimoruk tipu rua ne’e sei iha estoke iha armazein, maibé ami orienta ba Diretór Saúde Munisípiu sira atu toma atensaun labele distribui ba sentru saúde no postu saúde sira. Tanba produtu rua ne’e sai ona referénsia ba ami atu esforsu hodi kontrolu kualidade aimoruk atu povu sira konsumu aimoruk ho seguru ho saúde ne’ebé mak di’ak,” Santana Martins esplika.

Entretantu, Jestór Klínika Bairru-Pité, Inácio do Santos, informa ba aimoruk tipu rua ne’e ne’ebé mak laiha kualidade klínika rasik seidauk simu despaixu hosi Ministériu  Saúde atu suspende aimoruk dexamethasone no  simvastatin.

“Too agora, ami seidauk simu despaixu ruma husi Ministériu Saúde kona-ba item rua ne’ebé mak laiha kualidade tanba aimoruk dexamethasone ami estoke menus, maibé simvastatim ami estoke iha hela,” nia afirma.

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here