Administradór Postu Administrativu Suai Vila, Luzinho do Rego. Imajen Tatoli/Celestina Teles.

COVALIMA, 20 juñu 2022 (TATOLI)–Administradór postu administrativu Suai, Luzinho do Rego informa, komunidade iha suku Suai Loro no Beco liu-liu iha aldeia no sub aldeia balun, iha postu administrativu Suai Vila to’o agora seidauk asesu eletrisidade.

Notísia Relevante: Komunidade aldeia tolu iha sucu Beco seidauk asesu eletrisidade

“Ha’u-nia komunidade iha postu administrativu Suai Vila, falta suku Suai Loro iha sub aldeia Laen Tolu no suku Beco iha aldeia tobur, Teda Leowalu, Tidilpo ho Vibel aldeia Haemanu, sub aldeia Dilu-Hilin mak seidauk asesu eletrisidade,” Luzinho do Rego informa ba Agência Tatoli iha resintu administrasaun munisípiu Covalima, Kampung Baru, segunda ne’e.

Postu administrativu Suai Vila kompostu hosi suku Suai Loro iha aldeia Loro, Lo’o, Mane-ikun, Akar-Laran no Sukabi-laran, suku Beco iha aldeia Haemanu, Aidantuik, Holbolu, Maucola, Bibiatan, Halik, Teda, Tobur, Gala, Zoak, Tudilpo hosi aldeia ne’e balun seidauk asesu eletrisidade.

Maske nune’e. tuir nia, provizoriu komunidade sei uza panél solár ne’ebé iha tinan 2009 Governu mak apoiu ba komunidade iha aldeia balun maibé panél solár ne’e falla totál, nune’e komunidade na’in sosa rasik uza iha tempu kalan hodi bele hetan naroman netik.

Tuir loloos, iha aldeia haat suku Beco nian iha tinan 2015 atu dada eletrisidade ba komunidade, maibé tanba pesoál balun tenta halo intervensaun entaun la konsege realiza hodi dada eletrisidade ba komunidade.

Ho nune’e, VIII Governu Konstituisionál muda mekanizmu prosesu hotu liuhosi loke konkursu haree mós nia eskala prióridade, haree ba komunidade ne’ebé mak seidauk asesu eletrisidade haree ba suku, hafoin haree ba aldeia sira-ne’ebé seidauk asesu eletrisidade.

Aleinde ne’e, administradór Suai Vila ne’e relata suku iha aldeia ne’ebé seidauk asesu eletrisidade, nia mós informa suku no aldeia ne’ebé mak 100% asesu ona eletrisidade iha postu administrativu Suai Villa.

Suku sira-ne’ebé asesu ona liña eletrisidade mak hanesan suku Camanasa iha aldeia Camanasa, Sanfuk, Fatu-isin, Manequin no Ailok-laran, suku Labarai iha aldeia Mukbelis, Roek, Bonuk, Holba no Meop no Suku Debos iha aldeia Asumaten, Asurai, Ahinarai, Tabacolot, Looqueu, Busakukun, Lontale, Lakonak Babu no Lakonak Besik.

Antes ne’e, iha 22 fulan-abril 2022, Xefe Unidade EDTL, E.P Covalima, Alexandre Seran, hateten munisípiu Covalima iha suku 30 maibé komunidade suku 23 mak asesu ona eletrisidade no falta suku hitu (7) mak seidauk asesu eletrisidade.

Suku hitu ne’ebé seidauk asesu eletrisidade mak hanesan suku Lour, Fatumea Vila, Dato-Tolu, Dato-Rua, enkuantu suku Laktos, Mape no Usecai, ekipa téknika EDT, E.P, prosesu servisu oras ne’e daudaun la’o hela iha terrenu.

Jornalista : Celestina Teles

Editór      : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here