Jogu Liga Feto, Maudoko FC kontra Valeia de Lahane (VDL). Iha Estadiu Munisipál Dili, kinta (19/08). Imajen Tatoli/Francisco Sony

DILI, 20 juñu 2022 (TATOLI)– Prezidente Federasaun Futeból Timor-Leste (FFTL), Francisco Martins da Costa Pereira Jerónimo, informa hahú fulan-jullu sira loke ona janela transferénsia ba klube primeira divizaun no segunda divizaun Liga Feto Timór (LFT) nian, nune’e agostu bele hahú ona liga.

Prezidente FFTL, Francisco Jerónimo. Imajen TATOLI/Francisco Sony

“Liga Feto Timór nian, ita hahú jullu loke ona janela transférensia atu iha agostu ne’e liga hahú la’o ona, ida ne’e ba primeira divizaun no segunda divizaun,” Prezidente FFTL hateten ba ba Agência TATOLI iha edifísiu FFTL-Dili, segunda ne’e.

Klube feto ne’ebé atu kompete iha liga mak hanesan primeira divizaun, S’Amuser FC, Buibere FC, AD SLB, Maranatha FC, Academica FC, VDL no ASS Baucau. Enkuantu segunda divizaun mak hanesan, Maudoko FC, Nain Feto FC, Unital FC no São José FC.

Entretantu, iha tinan 2021, kampiaun ba Liga Feto Timor mak S’Amuser FC.

LFTL loke ona janela transferénsia époka 2022

Molok ne’e, Liga Futeból Timor-Leste (LFTL), hahú  iha loron (21/02) too (21/03) loke ona janela transferénsia ba klube 19 ne’ebé hamahan an iha LFTL hodi halo rejistu ba jogadór nune’e bele partisipa iha liga époka ne’e tuir kritéria no oráriu   Asian Football Confederation (AFC) nian loke ona iha 10 fevereiru too 10 marsu.

Tanba ne’e, LFTL husu ba klube hotu atu hakbesik an ba edifisiu LFTL hodi rejista naran jogadór sira nune’e bele kompete iha liga tinan 2022 nian.

Iha époka ne’e kompetisaun sei la’o nakonu iha tinan ida nia laran, tuir kalendáriu tentativa ne’ebé iha ona sei hahú 21 abríl no ramata iha 12 novembru tinan ne’e.

Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.

Alende ne’e, iha jogu tasa 12 Novembru sei joga hosi klube 19 no nafatin hosi sistema vota fora ou lakon sai hamutuk jogu 18.

Klube 19 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Lalenok United FC, Atletico Ultramar, Academica FC no Porto Taibessi FC.

Enkuantu Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.

Notísia relevante: Hahú ohin, LFTL loke janela transferénsia époka 2022

Jornalista: Hortencio Sanchez

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here