Komisáriu CAC, Sergio Hornai, hala’o abertura ba formasaun tékniku kona-bá aperfeisoamentu koñesimentu autoridade kompetente iha Sistema Rejime Deklarasaun Rendimentu, Bens no Interese ba Espesialista Anti-Korrupsaun na’in-15.Imaje/CAC

DILI, 20 juñu 2022 (TATOLI)— Comissão Anti Corrupção (CAC) hetan apoiu hosi United Nation on Drugs and Crime (UNODC), segunda ne’e, realiza formasaun tékniku kona-bá aperfeisoamentu koñesimentu autoridade kompetente iha Sistema Rejime Deklarasaun Rendimentu, Bens no Interese (DRBI) ba Espesialista Anti-Korrupsaun (EAK) na’in-15.

Formasaun tékniku ne’e fasilita hosi eis-Juíz, Tilman Hoppe, peritu internasional ne’ebé suporta reforma iha nasaun 40-resin iha área prevensaun no investigasaun korrupsaun, espesifikamente ba área Deklarasaun Rendimentu, Bens no Interese (DRBI).

Notísia relevante:  Kargu Xefia iha instituisaun Estadu na’in-365 deklara ona rikusoun

Formasaun sei hahú durante loron lima, hahú iha loron 20 too 24 juñu. Formasaun ne’e realiza tanba haree ba kompleksidade oioin hosi implementasaun rejime DRBI sira ne’ebé daudaun ne’e CAC rejista hela ajénte públiku sira nia rikusoin-sira.

Kompleksidade iha rejime deklarasaun rikusoin ne’e mós inklui ona ho prosesu kona-ba hala’o verifikasaun formál no auditóriu iha tereñu ne’ebé sei mai, bainhira autoridade responsavel termina simu ajénte públiku sira nia deklarasaun rikusoin ne’ebé sujeita hela ba rejime ne’e iha lei númeru 7/2022-Medida Prevensaun no Kombate Korrupsaun (MPCC).

Objetivu prinsipál husi formasaun ne’e mak atu mellora ka eleva koñesimentu kle’an EAK sira nian, liu-liu atu halo kapasitasaun téknika ba ekipa ne’ebé konstituidu iha DRBI iha Komisaun, oinsá atu deteta konflitu interese sira no rikusoin sira ne’ebé ajénte públiku sira la deklara.

Nune’e, Komisáriu CAC, Sergio Hornai, hateten formasaun ne’e esensiál tebes ba CAC nia espesialista sira hodi buka intende liután preseitu sira ne’ebé iha ligasaun ho lei Medida Prevensaun no Kombate Korrupsaun.

Finalidade husi formasaun ne’e mak sei re-inforsa servisu Komisaun nian hodi hametin liután ajénte públiku sira ne’ebé haknaar-an iha instituisaun Estadu nia integridade hodi prevene no kombate kriminalidade korrupsaun iha Timor-Leste.

“Hirak ne’e hotu atu hametin integridade no responsabilidade instituisaun sira nian, liu-liu ba ajénte públiku sira atu nafatin iha konfiansa perante iha sosiedade nia laran”, Komisáriu ne’e hateten ba jornalista sira.

Iha biban hanesan, Perítu Tilman Hoppe, afirma sente orgullu ho vontade politika Timor-Leste nian hodi opta rejime deklarasaun rikusoin nian iha Estadu TL, liuliu CAC ne’ebé servisu ho boa vontade iha misaun prevensaun no kombate korrupsaun iha implementasaun rejime juridiku ida ne’e nian.

Ba formasaun loron ida, nia dehan foku esplika matéria sira liga ho prosesu ka etapa sira ba deklarasaun rikusoin ninian, verifikasaun formal ba ajénte públiku sira nia deklarasaun tuir lei númeru 7/2020-MPCC no halo arkivamentu sira.

Notísia relevante:  Instituisaun Estadu 100 deklara riku-soin ba CAC iha 2022

Jornalista : Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here