Vítima TBC ne'ebé lakon vida hafoin hetan hetan xoke iha loron-domingu, 19 juñu 2022. Imajen espesiál.

BAUCAU, 20 juñu 2022 (TATOLI) – Asidente tráfegu ne’ebé akontese iha área Eskola Báziku Filiál (EBF) Bucoli, postu administrativu Baucau Vila rezulta inan-feton ida ho idade 69 lakon vida tanba kondisaun grave.

Asidente ne’e akontese iha loron-domingu, 19 juñu, oras 13.00 iha suku Bucoli, postu administrativu Baucau vila, tanba motorista hosi Juiza Administradara Tribunál Distritál Baucau (TDB) matan-dukur.

Tuir kronologia, arguidu inisiál EDC hosi diresaun Vemasse atu ba Baucau, bainhira to’o iha área Eskola Báziku Filiál (EBF) Bucoli lakon kontrolu tanba dukur nune’e xoke vítima insiál TS idade 69 hosi parte karuk ne’ebé rezulta lampu karreta parte karuk hetan estragu.

Enkuantu vítima konsege transporta to’o Hospital Rejionál Eduardo Ximenes (HorEX) Baucau maibé la konsege salva tanba kondisaun grave.

“Horisehik xoke vítima hetan pankada maka’as, ita-nia tránzitu ba konsege lori ba HoREX maibé la konsege salva nia vida tanba pankada iha ulun no kotuk-laran,” Komandante Polísia Nasionál Timor-Leste (PNTL) Munisípiu Baucau, Superintendente António de Sá hateten iha Vila Nova, segunda ne’e.

Motorista EDC kondús karreta marka Prado ho xapa-matríkula TDB 001 iha relasaun família fetosaa-umane nune’e iha konkordánsia atu rezolve tuir família hanesan responsabilidade ba prosesu fúnebre.

Daudaun ne’e, evidénsia karreta asegura iha komandu PNTL Baucau hodi kontinua ba prosesu ho klasifikasaun omisídiu neglijente ka motorista kondús karreta la ho atensaun tanba kondisaun dukur.

“Asidente ne’e akontese fatór umanu duni tanba iha kondisaun dukur entaun ladún fó atensaun, ne’e perigozu ba nia vida rasik no ema seluk,” António de Sá akresenta.

Jornalista   : Natalino Belo 

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here