Prezidente Alumni Parlamentu Foinsa’e Timor-Leste (APFTL) ho ekipa, segunda ne’e, hala’o audiénsia ho Prezidente Repúblika, José Ramos Horta. Imajen/Mídia PR.

DILI, 20 juñu 2022 (TATOLI)—Prezidente Alumni Parlamentu Foinsa’e Timor-Leste (APFTL) ho ekipa, segunda ne’e, hala’o audiénsia ho Prezidente Repúblika, José Ramos Horta, iha Palásiu Prezifdensiál Nicolau Lobato, Bairru Pite, Dili.

Prezidente Alumni Parlamentu Foinsa’e Timor-Leste (APFTL), Jaulino Gomes da Silva, relata ezisténsia APFTL no estudu liu-liu joven sira-nia preferénsia ba setór edukasaun, empregu  no partisipasaun síviku liu-liu ligadu ho joven sira-nia preferénsia ba edukasaun liu-liu área estudu ka fakuldade atu foti.

Ho ida-ne’e, nia hatutan, APFTL kontinua halo advokasia tulun polítika Governu liuhosi alokasaun Orsamentu Jerál Estadu (OJE) kada tinan hodi mellora setór edukasaun iha rai-laran.

“Tan ne’e informa ba Prezidente Repúblika fó kontinidade halo advokasia hodi tulun Governu nia polítika oinsá integra iha programa Governu hodi influensia Orsamentu Jerál Estadu (OJE),” nia hateten ba jornalista sira hafoin ramata enkontru ho Xefe Estadu, José Ramos Horta.

Nia dehan, peskiza ne’e uza métodu kuantitativu diskritivu deskreve situasaun reál Timoir-Leste nian ne’ebé iha respondente na’in-2000 hosi munisípiu 13 inklui Rejiaun Administrativu Espesiál Oé-Cusse Ambeno (RAEOA).

Nune’e, iha dadus 44% joven sira iha ensinu superiór hili la tuir sira-nia preferénsia eskola ne’ebe sira eskola ba no fakuldade sira-ne’ebé sira hili la tuir sira-nia hakarak.

“Relatóriu ne’e, joven ka estudante ninia preferénsia ba eskola tékniku vokasionál menus liu kompara ho siénsia naturál no sosiá, ne’ebé sira prefere liu foti kursu rua ne’e duké tékniku vokasionál tanba seidauk hatene ninia importánsia,” nia dehan.

Jaulino Gomes hateten, peskiza seluk ne’ebé sira hala’o hela mak kona-ba labarik no adolosente utiliza internet, tanba daudaun ne’e VIII Governu Konstitusionál liuhosi SEKOMS halo kampaña internet saudavél, nune’e hosi peskiza ne’e oinsá ajuda liután polítika ne’e.

“Iha relatóriu ne’e, hatudu katak iha violénsia online mosu abuzu lubuk ida akontese iha, nune’e ami hanoin daudaun Parlamentu Nasionál elabora hela projetu-lei protesaun labarik no joven iha perigu,” nia dehan.

Nune’e, liuhosi bibán ne’e, PR bele ko’alia ho órgaun soberanu sira seluk hodi bele haree lei ne’ebé diskusaun hela oinsa proteje labarik, adolosente sira utilizasaun internet ne’e.

Iha parte seluk, APFTL relata servisu advokasia ne’ebé daudaun ne’e la’o hela ba asuntu joven sira iha setór produtivu hanesan agrikultura.

PR konsidera advokasia ne’ebé APFTL hala’o importante tebes ho aprezentasaun dadus oinsá fó ninia kontinuidade, nune’e hodi haree bele tulun ezekutivu ninia polítika foti desizaun  iha situasaun rai-laran.

Enkuantu, durante ne’e APFTL hala’o advokasia hetan asisténsia hosi Sekretáriu Estadu Juventude no Desposrtu (SEJD) no parseiru internasionál UNICEF.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here