Prezidente Asosiasaun Futeból Bononaro, Domingos Gouveia Moniz. Imajen Tatoli/Sergio da Cruz.

BOBONARO, 19 junu 2022 (TATOLI)—Prezidente Asosiasaun Futebólol Bononaro (AFB), Domingos Gouveia Moniz, informa asosiasaun munisipál iha planu sei realiza torneiu futeból ba sub-16 iha fulan-agostu nu’udar kompetisaun daruak nian iha epoka 2022.

Notísia Relevante: Manán 2-1, Madiran FC sai kampiaun iha jogu sub-23 Bobonaro

“Atu fó sai deit iha Prezidente Federasaun Futeból Timor-Leste nia oin no komunidade Maliana katak depois de jogu ida-ne’e, ami-nia ajenda sei realiza jogu ka torneiu futeból sub-16 antes fulan-agostu,” Domingos Gouveia Moniz anunsia planu ne’e iha ninia intervensaun ba serimonia entrega taxa ba manan-na’in kompetisaun jogu sub-23 ne’ebe realiza iha kampu Futeból Maliana, sábadu ne’e.

Nia dehan, liuhosi kompetisaun mak bele identifika fini foun ne’ebe durante ne’e subar hela sira-nia talentu liu-liu sira-ne’ebe hela liu iha área rurál.

Tuir observasaun, durante ne’e liuhosi eventu sira-ne’e jogador sira hahú maduru no laiha ona konflitu entre no iha bairru sira tanba hotu-hotu hakarak inklina an iha mundu futeból.

Tamba ne’e, nia husu ba klube futeból sira-ne’ebe eziste iha kapital Maliana rejista ona iha asosiasaun Inklui klube sira postu administrative Atabae, Balibo, Cailaco, Bobonaro no Lolotoe atu hahu ona halo preparasaun fiziku no tátika, nune’e bele hatudu preparasaun di’ak antes mai kompete iha torneiu futeból U-16 ne’ebé sei realiza iha agostu ne’e.

“Jogu ne’e sei fó oportunidade ba klube futrból sé de’it mak hakarak partisipa. Maibé, importante liu mak tenke badinas treinu, nune’e bele kompete di’ak liután no bele sai Jogadór di’ak reprezenta munisipiu Bobonaro ba joga iha Nasionál,” nia dehan.

Antes ne’e, iha fulan hirak liu ba Asosiasaun Futeból Bobonaro (AFB) mós identifika ona treinadór na’in-22 atu partisipa iha formasaun lisensa (D) ne’ebe oferese hosi Federasaun Futeból Timor-Leste (FFTL), nune’e bele lidera klube sai kualidade.

Prezidente ne’e mós rekoñese durante realiza kompetisaun tinan-tinan arbritazen ho ninia asistente sira foti desizaun la konsisten no la kondiz ho realidade, nune’e sempre hetan kritika hosi treinadór klube Inklui adeptu sira.

“Frakeza sira-ne’e nu’udar umanu la sees hosi sala. Tanba ne’e, nudar Prezidente Asosiasaun, ha’u husu deskulpa ba klube hotu maibé ami promete sei hadi’a iha future, nune’e bele armoniza jogu iha kampu,” nia promete

Tuir dadus, daudaun ne’e AFB iha ona árbitru kuaze na’in-37. Hosi númeru ne’e, na’in-10 ho sertfikadu lisensa (C) kompostu hosi mane ualu (8) no feto rua (2) no restante maioria ho serfikadu bázika lisensa (D), maibe árbitru hirak-ne’e na’in-16 mak ativu hela no barak mak la ativu ona tanba okupadu ho serbisu seluk.

Jornalista : Sergio da Cruz

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here