Sekretáriu Jerál Partidu CNRT, Francisco Kalbuady Lay, hamutuk ho Komisáriu Politika Nasionál sira, hala’o abertura ba konsolidasaun nasionál ho tema “Hametin abut CNRT iha baze”.Imajen/Nelson de Sousa.

DILI, 18 juñu 2022 (TATOLI)— Partidu Congresso Nacional de Reconstrução Timorense (CNRT), sábadu ne’e, hala’o abertura konsolidasaun nasionál ho tema “Hametin abut CNRT iha baze”, hodi prepara-an hasoru eleisaun parlamentár iha tinan 2023.

Biban ne’e, Sekretáriu Jerál Partidu CNRT, Francisco Kalbuady Lay, hateten ho abertura ne’e hahú ohin ba oin partidu komesa hala’o atividade konsolidasaun hosi nasionál, munisípiu, postu administrativu, suku hodi ba too baze atu hametin estrutura hodi hasoru Eleisaun Parlamentár iha tinan oin.

“Ohin ba oin haree de’it mak servisu konsolida hahú hosi Dili too iha munisípiu hotu inklui Rejiaun Administrativu Espesiál Oé-Cusse no Ambeno (RAEOA) hodi prepara ba eleisaun parlamentár,” Sekretáriu Jerál Partidu hateten liuhosi intervensaun abertura konsolidasaun iha salaun Katedrál, Dili.

Kalbuady Lay afirma haree ba tema ne’ebé iha partidu presiza hametin duni estrutura hahú hosi baze tanba baze la metin iha leten mós labele halo buat ida.

Nune’e Prezidente Partidu CNRT, Kay Rala Xanana Gusmão fó ona instrusaun ba estrutura iha nivél nasionál too aldeia atu servisu makas liután.

“Maun Xanana, ohin labele partisipa iha ne’e tanba iha servisu ba rai liur ne’ebé fó hela instrusaun mai katak hahú ohin ba oin munisípiu 12 inklui RAEOA ne’e estrutura nasionál tenke tun ona ba kraikservisu makas liután atu gaña vitória iha eleisau parlamentár tinan oin,” SekJen CNRT hato’o.

Nia fó sai mós katak alende konsolidasaun partidu mós iha ona programa seluk sei bá fahe iha munisípiu ida-idak hodi servisu hamutuk ho koordenadór partidu atubele implementa programa hanesan desportu, kulturál no seluk tan.

SekJen Kalbuady Lay, lori Prezidente Partidu CNRT no CPN hato’o agradesementu ba estrutura, movimentu oioin no partidu aliadu sira seluk ninia kontribuisaun servisu durante Eleisaun prezidensiál iha primeiru no segunda volta.

“Husu estrutura atu kontinua servisu sira hodi hasoru eleisaun parlamentár mai no prontu servisu ho partidu aliadu no movimentu ne’ebé de’it hodi fó vitória iha eleisaun parlamentár hodi fila ba ukun iha Governu,” nia sujere.

Iha fatin hanesan, Koordenador Partidu CNRT Munisípu Dili, Luis Ximenes Caldeira, kompromete ba partidu prontu servisu ho esforsu maka’as liután atu hasoru eleisaun parlamentár tinan oin.

Enkuantu, partisipa iha abertura konsolidasaun ne’e kompostu hosi estrutura partidu, membru CPN, koordenadór partidu CNRT hosi munisípiu 13 inklui RAEOA, reprezentante partidu PSD, UDT no sira seluk ho mós ho grupu movimentu sira.

Notísia relevante: CNRT preparadu hasoru eleisaun parlamentár 2023

Jornalista: Nelson de Sousa

Editór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here